17/10/2013 17:46:49

''Konkursi'' i tranzicionit universal në Tiranë

Vepra që trajton një aspekt shumë aktual të realitetit tonë

TIRANË - Regjisori shqiptar nga Maqedonia, Kushtrim Bekteshi, pas muajsh të gjatë provash në Tiranë, sjell premierën e veprës “Konkursi” të autorit rus Aleksander Galin. Premiera shfaqet për publikun në Teatrin e Metropolit, salla "Shekspir", ditën e nesërme.

“Konkursi” trajton një aspekt shumë aktual të realitetit tonë. Është një vepër me temë universale, që flet për periudhën e tranzicionit, ku njerëzit kanë humbur garën me jetën. Bëhet konkurs në kohë tranzicioni, ku njerëz të shtresave të ndryshme shoqërore, si mundësi të vetme shohin ikjen jashtë shtetit ku jetojnë.

Sipas regjisorit Bekteshi, autori, duke e vënë si bosht kryesor në vepër konfliklin mes çifteve bashkëshortore, gjithë këtë dramë të personazheve e sjell me një gjuhë komike. "Janë disa autorë të njohur rusë, të cilët trajtojnë tema të tranzicionit, merren me fatin e njerëzve të thjeshtë dhe duke trajtuar tema që në dukje janë të thjeshta, ata arrijnë me mjeshtëri të shfaqin një fotografi të përgjithshme të realitetit që jeton Rusia në kohë trancizoni dhe gjithë vendet postkomuniste”, shprehet Bekteshi.

Shfaqja nuk do të ketë skenografi mirëfilli, ka vetëm sende rekuizite. Sipas regjisorit, vepra është trajtuar në formën e realizmit të stilizuar. “Vepra është komedi, por unë e kam trajtuar si tragjikomedi. Dramat dhe tragjeditë janë ato që më tërheqin më shumë. Më pëlqejnë veprat ku trajtohen fatet individuale dhe raportet mes personazheve janë komplekse”, tha Bekteshi për mediat.

Kostumografia vjen në të njëjtën frymë të të gjithë shfaqjes, kostume që janë punuar enkas për këtë premierë në Maqedoni nga Marija Pupuçevska me asistimin e Marta Trëndafilovës.

Gjithashtu aktorët do të kenë mundësi të këndojnë e performojnë live ne skenë pjesë koreografike, me te cilat ka punuar Albi Minarolli. Interpretojnë aktorët Rozi Kostani, Agzona Ademi, Erjeta Cufaj, Klodjan Hoxha, Vilma Hodo, Xheni Hallulli, Devis Muka, etj. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin