14/10/2013 17:17:13

Gjenden mbetje mortore ne Deçan

EULEX njofton sot se, zbulimi u bë prej një qytetari, i cili ishte duke ecur nëpër një fushë në afërsi të fshatit Rastavicë në Deçan dhe se rasti ishte raportuar pasditen e së premtes

PRISHTINË - Gjenden mbetje mortore në afërsi të Deçanit, ndërkohë që Kosova mëse 14 vjet pas luftës, vazhdon të kërkojë zbardhjen e fatit të më shumë se 1700 qytetarëve të saj të zhdukur.

Ekspertë të EULEX-it nga Departamenti i Mjekësisë Ligjore dhe Njësia e EULEX-it për Hetimin e Krimeve të Luftës, të shtunën nxorën mbetjet mortore të së paku katër personave, që besohet se i takojnë kohës së konfliktit në Kosovë.

EULEX njofton sot se, zbulimi u bë prej një qytetari, i cili ishte duke ecur nëpër një fushë në afërsi të fshatit Rastavicë në Deçan dhe se rasti ishte raportuar pasditen e së premtes.

Alan Robinson, bashkëudhëheqësi i Departamentit të Mjekësisë Ligjore, tha se ata kishin gjetur një numër të konsiderueshëm të eshtrave, disa rroba dhe indikacione të tjera të fuqishme se ato i përkisnin periudhës së konfliktit në Kosovë apo periudhës rreth asaj kohe.

Që nga fillimi i Misionit EULEX, ekspertët në Departamentin e Mjekësisë Ligjore kanë kryer 407 operacione në terren, me qëllim të mbledhjes së të dhënave, të cilat kanë mundësi të çojnë në zhvarrosje dhe procese të tjera të ndërlidhura mjeko-ligjore. Prej këtyre, 267 ishin persona të zhdukur, ndërsa pjesa tjetër kishte të bënte me rastet penale apo kërkesat për vërtetimin e identitetit nga ana e familjeve. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin