09/10/2013 11:50:29

Tartë me krem gjizë dhe rrush

nga Brunhilda Çela

Sekretet e aromave të Brunhildës Brumin e tartës e bëra me lajthi të pjekura e të bluara 200 gr, me miell 300 gr, vezë 3 kokrra, gjalp 250 gr, sheqer vaniljeje 1 pako, lëkurë limoni, sheqer normal 3 - 4 lugë e pak pluhur pjekës rreth 1 lugë çaji.

Bleva dhe një pako brumë sfoliat (foto) për gjethet dhe për rrjetën mbi tartë. Pasi mbarova dhe më pëlqeu perfundimi, përveç në pjekje nuk ma mbushi shumë syrin u poq pak më tepër seç duhej dhe nuk e kishte atë bukurinë si e papjekur.

Atëherë vendosa të bëja edhe një të dytë të shtunën meqë e pata pushim e kohë kisha plot dhe të rregulloja gabimin në pjekje doja që në pjekje të dilte në ngjyrë të artë dhe këtë e arrita duke e mbuluar me një tepsi alumini të dytë e duke e lyer ndërkohë gjatë pjekjes tre herë me përzierje të verdhë vezë - qumësht.

Për mbushjen e tartës përdora 3 pako gjizë të ëmbël që janë 750 gr gjithësej një pako krem të thartë, apo pana acida më duket se i thoni ju në Shqipëri (pavllak i thonë në Kosovë), maskarpone rreth 250 gr, 2 lugë niseshte, 3 të verdha veze, 3 të bardha të rrahura e të bëra marengë që të krijoja një strukturë të sfungjertë tek mbushja. I vura gjithashtu rreth 100 gr sheqer, 1 pako sheqer vaniljeje, lëkurë limoni, lëngun e një limoni e pak rum për aromë.

Brumin e tartës e shtrova në tavë duke e hapur direkt me grushta jo të gjithin se lashë për veriget e rrushit, biles tek tarta e dytë e bëra akoma më të hollë shtresën e brumit e ngeli goxha brum saqë përdora dhe gjethet me brumin e tartës e brumin sfoliat vetëm për rrjetat dhe ato të përdredhurat e rrushit e përdora.

Pjekjen e bëra në fillim poqa shtresën e tartës duke e ç'puar me piru në shumë vende rreth 10 minuta. Tek tarta e parë i vura sipër një letër pjekëse e mbi letrën pjekëse një ngarkesë me gurë, tek e dyta nuk e bëra fare e shumë mirë doli.

Pastaj i vura sipër shtresën gjizës e nëpër të tek shtresa e gjizës i vura 500 gr rrush rozë pa farë të përzier me 150 gr salce të bërë vetë të rrushit me erë.

Tek e para i vura niseshte tek e dyta nuk e bëra se nuk ishte e nevojshme fare gjiza mpikset dhe lëngun e tepërt e thith gjiza dhe krijohet një kombinim i bukur ngjyrash poshtë rrjetës.

Dje e servira për miqtë por nuk mund t'i bëja foto gjatë servirjes, pasi nuk do ishte e udhës. E servira mbi pjatë ku vura dy lloj salcash një rrush dhe një me qumësht panda e me kunjën e drurit i bëra një strukturë të bukur poshtë pjatës e sipër tartës i vura sheqer pluhur me bollëk, e zbut dhe i jep më teper shije. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin