06/10/2013 17:30:00

20 vjet Karitas Mirdita dhe Projekt Albanien

Puna e Kryqit të Kuq filloi në gushti të vitit 1992, kur humanisti austriak famullitari Franz Winsauer, do të vinte në Shqipëri dhe posaçërisht ne Mirditë, i ngarkuar për ndihmë nga Kryqi i Kuq Ndërkombëtar

MIRDITE - 20 vjetori i veprimtarisë humanitare të “Karitas Mirdita, Projekt Albanien”, është përkujtuar sot në Rrëshen (foto) përmes një veprimtaria multidimensionale, duke nxjerr në pah kontributin 20 vjeçar të këtij organizmi humanitar në Mirditë si dhe promovoi projektet për të ardhmen.

Ka qenë gushti i vitit 1992, kur humanisti austriak famullitari Franz Winsauer, do të vinte në Shqipëri dhe posaçërisht ne Mirditë, i ngarkuar për ndihmë nga Kryqi i Kuq Ndërkombëtar, për të vazhduar me një sërë projektesh ndihme dhe zhvillimi sidomos në sektorin e arsimit, ringritjen e objekteve të kultit, ndihmen ndaj familjeve në nevojë, fushën e kulturës e sektorë të tjerë të jetës sociale dhe shoqërore të kësaj krahine.

Për kontributin e dhënë përgjatë këtyre viteve. Bashkia e Rrëshenit vlerësoi me mirënjohje të bashkisë: Manfred Kräutler, Qendra e kujdesit ndaj nxenesit (Schülerbetreuung), Daniela Thaler, Projekti i familjeve ne nevoje (Familienpatenschaften) dhe Pfarrer Franz Ëinsauer Drejtuesi i Projekt Albanien ( Leitung Projekt Albanien).

Ndërkohë i gjithë aktiviteti u përcoll përmes një show të dedikuar posacërisht për një veprimtari të tillë, nga pallati i kulturës Rrëshen, ku nuk mungoj kënga dhe vallja e traditës vendase dhe muzika moderne, në prezantimin e gazetarit dhe drejtorit të Qëndrës Kulturore Gjergj Marku.

Pos autoriteve vendore të Mirditës, morën pjesë dhe të ftuar të tjerë, konsulli i nderit i Austrisë në Shkodër Gjergj Leqejza dhe personalitete të tjera të artit dhe kulturës.

Folësit evidentuan faktin që ky organizim humanitar, ka mundur të prekë me investimet e veta në shume fusha, pothuaj të gjithë qytetet dhe fshatrat e kësaj krahine, si dhe qindra familje në nevojë që asistohen cdo muaj me ndihma të ndryshme, si dhe duke hapur qendra artizanati dhe kursesh për gra e vajza si dhe për persona me aftësi të kufizuar, cka e bën të vecantë në organizime të këtij lloji në Shqipëri.

Drejtuesi i projektit, Franz Winsauer, edhe pse tashmë i ka kaluar 80 vitet, ka premtuar se projekti do të vazhdojë me energji të reja pas këtij 20 vjetori dhe do vazhdojë t’u dedikohet shtresave në nevojë, grave dhe vajzave, të sëmurëve dhe ndihmën ndaj shkollave dhe institucione të tjera sociale dhe kulturore. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin