04/10/2013 17:20:18

Të shpëtojmë ekonominë

Rama, ''Qeveria nuk është shteti, është vetëm një pjesë e shtetit, ndërkohë që ekonomia është e të gjithë atyre që në këtë shtet merren me biznes''

TIRANE - Kryeministri Edi Rama siguroi mbështetje, shlyerje të plotë të borxheve që janë krijuar ndaj sipermarrjes me rreth 600 milionë usd, premtoi se do të drejtojë betejën e ashpër kundër krizës dhe kalimin në një fazë të re të ekonomisë.

"Do shlyejmë të gjitha borxhet, nuk duam ti kemi borxh njeriut. Ne duhet të bëjmë zgjidhjet e kërkuara më çdo çmim, në mënyrë që nesër vendi të rifutet në rrugën e rritjes ekonomike", tha Rama sot në takimin me biznesin "Dialog, përgjegjësi, partneritet", orgnizuar nga ministria e Zhvillimit Ekonomik, Tregtisë dhe Sipërmarrjes.

Rama kërkoi bashkëpunim në tejkalimin e krizës ekonomike, që e quajti “anije që po mbytet”.

“Në anijen e ekonomisë të këtij vendi qeveria dhe sipërmarrja janë bashkë, bashkë duhet ta nxjerrin në ujërat e qeta anijen, duke kapërcyer dallgët e mëdha që kemi sot dhe ato ende më të mëdha që kemi përpara”, tha Rama.

Kryeministri theksoi nevojën për formalizim të ekonomisë dhe spas tij, “GDP e vendit nuk është 10 miliardë usd, sepse ende nuk dimë se sa është ekonomia informale”. Kryeministri ripërsëriti kërkesën për një auditim të plotë ndaj bizneseve të mëdha dhe premtoi se do të hulumtohet cdo kontratë koncensioni e lidhur, nëse janë respektuar afatet.

"Do të ç'fuqizohet c'donjë që rezulton me shkelje të ligjit", tha Rama. Duke vënë theksin tek ndryshimi i metodës së deritanishme në shlyerjen e detyrimeve që ka shteti ndaj biznesit publik, Rama tha se "për energjinë elektrike, shteti rezulton borxhliu më i keq”. “Kemi borxhe në transport, punë të papaguar ndaj kompanive, ndaj sektorit të ujërave, sektorit shëndetësor, përfshi detyrimet e ilaçeve. Kemi borxhe në sektorin e arsimit, kemi TVSH e parimbursuar” tha Rama.

Sipas Tij, “Shqipëria nuk ka nevojë më për mjaltin e gënjeshtrave, por asaj i duhet ilaçi i hidhur i të vërtetave”. Rama siguroi sipërmarrësit se Doganat dhe Tatimet do kthehen në një strukturë në dispozicion të qeverisë dhe komunitetit të tyre.

Kryeministri pohoi se ekonomia shqiptare sot është e bllokuar institucionalisht dhe financiarisht dhe në në krizën më të thellë pas asaj të vitit 1997. Duke konsideruar se “sot jemi pa buxhet dhe me sipërmarrje të bllokuar”, Rama analizoi dhe shkaqet, që lidhen me “një ekonomi të ndarë në dysh, të shtetit dhe kulakëve, të destinuar të shkojë në pikën ku ka vajtur sot: në një ekonomi të bllokuar që kërcënon të ndalë funksionimin e shtetit, nëse sot qeveria dhe sipërmarrja nuk ndalin krizën”.

Sipas Ramës, "Qeveria nuk është shteti, është vetëm një pjesë e shtetit, ndërkohë që ekonomia është e të gjithë atyre që në këtë shtet merren me biznes”.

Përfaqësues të biznesit, Luan Bregasi, Nikolin Jaka, Gjergj Buxhuku, Donika Mici, vlerësuan linjën e re dhe modelin ekonomik që ka zgjedhur qeveria “Rama”, duke premtuar mbëshetje dhe bashkëpunim me të. Kryeministri u shpreh se, “ende nuk dimë kush është dëmi real në ekonomi” dhe premtoi analizë të thelluar të situatës.

Rama tha se “duhet të bëjmë zgjidhjet e kërkuara me çdo çmim, në mënyrë që nesër vendi të rifutet në rrugën e rritjes ekonomike dhe sipërmarrja të ndahet nga rruga shumëvjeçare që në çdo hap ndeshet me dhunën, presionin, korrupsionin”. Shefi i qeverisë garantoi ngritjen e Këshillit Ekonomik Kombëtar, ku palët do të ulen çdo tre muaj për të diskutuar strategjitë për betejën e përbashkët kundër krizës dhe atë për mirëqenien.

Ministri i Financave, Shkëlqim Cani pohoi se “situata ekonomike e vendit është e rëndë”, por tha se qeveria është e vendosur të bëjë gjithçka që Shqipëria të ecë e sigurt drejt Europës. Cani deklaroi se situata e financave publike ka sot mangët 40 miliardë lekë dhe të ardhurat e buxhetit 2013 janë më të ulta se tre vjet më parë. “Ka rënie drastike prej 23% në raport me GDP. Të ardhurat nga Tatimet dhe Doganat janë në rënie 16.2% dhe një deficit buxhetor prej 130%”, tha Cani.

Ministri i Financave theksoi se të ardhurat sivjet janë shumë të ulta, shpenzimet buxhetore në 8 muaj u rritën më shumë se plani dhe detyrimet e papaguara krijuan një borxh shumë të lartë. "Sot borxhi publik arrin 68% dhe borxhi ndaj biznesit llogaritet në 4% të GDP, pra arrin në 72%”, tha ai.

Cani premtoi shlyerje të pagesave të vonuara, që do të kryhen pa cënuar tregun e brendshëm financiar, duke kërkuar ndihmën e FMN, BB dhe bankave të tjera. “Do të shlyejmë fillimisht bizneset që kanë kredi në banka, me qëllim që të lehtësohet shlyerja e kredive në to, pasi niveli i kredive të këqija bankare arrin në 25%”, tha ministri i Financave, Shkelqim Cani.

Ai shprehu bundjen se së bashku, qeveri-biznes, në një raport të ndershëm dhe duke patur mbështetjen e institucioneve ndërkombëtare do të kapërcehet kjo situatë në një afat kohor afatmesëm”. Cani u shpreh optimist se ekonomia do t’i rikthehet ritmeve normale të zhvillimit të saj. “Jemi në konsulta me partnerët ndërkombëtarë për të gjetur masat që i duhen ekonomisë për ndreqje”, tha ai.

Ministri i Zhvillimit Ekonomik,Tregtisë dhe Sipërmarrjes, Arben Ahmetaj e konsideroi sot krizën ekonomike ku gjendet vendi si “krizë e keqqeverisjes”. “Nëse qeveria aktuale nuk bën asgjë, ekonomia e vendit ndalon në harkun kohor të një viti”, tha Ahmetaj, sipas të cilit, modeli aktual ka dështuar, ekonomia shqiptare nuk mund të rritet më me borxhe, sepse e ka ezauruar kapacitetin vet të borxheve. "Nga këtu duhet të fillojë përmirësimi i situatës", tha ministri i Ekonomisë. Ai vuri në dukje se të ardhurat në buxhetin e shtetit janë më të ulëtat, krahasuar me 1997.

“Problemet i gjetëm, por ky nuk është justifikim, këto janë probleme të qytetarit shqiptar dhe në finale kjo qeveri e ka përgjegjësi direkte ti komunikojë dhe ti zgjidhë ato”, tha Ahmetaj. "Ne akoma nuk jemi një ekonomi që ka aktivitet eksporti të fuqishëm që të garantojnë zhvillim", tha Ahmetaj, sipas të cilit, “rritja ekonomike është shumë afër zero, është ndalur kjo ekonomi, nuk mund të sigurojë punësim”.

Ahmetaj kërkoi fillimin e një dialogu me biznesin, që ”deri sot ka qenë monolog” dhe u shpreh i bindur se pas 2 viteve do të rikthehet rritja ekonomike e qëndrueshme. "Jemi të bindur që në krye të 2 viteve, pasi të kemi kaluar një periudhë të ngarkuar dhe të përgjegjshme, ne do të jemi në gjendje të rikthejmë rritjen ekonomike në nivele 4 % e më sipër. Ne kemi një paketë që kthen besimin e sipërmarrjes tek qeveria”, tha Ahmetaj.

Ministri i Transportit dhe Infrastrukturës, Edmond Haxhinasto prezantoi sot situatën në dy sektorët, që kanë marrë rreth 60% të shpënzimeve publike, por që rezultojnë investime problematike, pasi ka nisje punimesh, shumica me kontrata të pambyllura dhe një borxh shumë të lartë. "Janë 450 milionë usd fatura për mbylljen e kontratave dhe 140 milionë usd është fatura me sipërmarrjen, ku vërehen shumë probleme me mënyrat e kontraktimit”, tha Haxhinasto.

Ministri u shpreh për probleme me cilësinë e punimeve në rrugë, pa sinjlistika dhe siguri rrugore, etj. “Do shikohet cilësia e punimeve për pagesat ku fillimisht do të shlyhen faturat e mëdha”, tha ministri, që kritikoi shërbimin ajror, që ka “cmimet më të larta në rajon dhe shërbim të ulët”. Haxhinasto premtoi ndryshim të planifkimit të investimeve, duke i dhënë përparësi strategjive rajonale me investime, me impakt ekonomik-social, rritje punësimi. Ai premtoi bashkëpunim me sipërmarrjen private duke respektuar cdo detyrim reciprok dhe larg klientelizmit. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin