03/10/2013 18:15:42

Duartrokitjet e fundit për Drita Pelingun

Homazhe në nderim të aktores Pelinku

TIRANË - Edhe në momentet e saj më të vështira, edhe në ditët e saj të fundit, Drita Pelinku (foto) nuk e humbi kurrë dëshirën për t’u ngjitur në skenë.

Kështu do ta kujtojnë të gjithë, miqtë, kolegët, familjarët, artisten e skenës dhe filmit shqiptar që për 60 vite dhuroi shpirtin në profesionin e saj. Mes duartrokitjeve të shumta, Pelinku u përcoll sot për në banesën e fundit.

Në nderim të aktores dhe pedagoges së shumë brezave artistësh u zhvilluan homazhe në Teatrin Kombëtar, atë që ajo e konsideronte shtëpinë e saj të dytë, të pazëvendësueshëm në jetën e saj.

Edhe pse në moshë të thyer, ikja e Drita Pelinkut konsiderohet e parakohe. Ajo ende endërronte të ngjitej në skenë. Mikja e saj, Tinka Kurti, kujton me lot në sy, telefonatën e tyre të fundit. "Drita i thashë më vjen keq, por unë do iki të bëj një rol të vogël në Divjakë. Të shkosh më tha, të shkosh…por unë kur do të dal përsëri në skenë”.

Personalitete të artit dhe politikës shqiptare nderuan sot, gjatë homazheve, aktoren Pelinku, themeluesen e Teatrit Kombëtar. "Me vdekjen e saj mbyllet dhe galeria e artit skenik shqiptar. Ajo ishte aktorja që bëri historinë e teatrit shqiptar. Ka pasur dhe emra të tjerë, por ajo spikati sepse dha një kontribut të madh në teatër”, tha aktori Fatos Sela, bashkëpuntori i saj i fundit në dramën “Përjetësisht dashuria”.

Dramaturgu dhe regjisori Mihal Luarasi, i cili e solli në skenë për herë të fundit aktoren Drita Pelinku, pohon se vdekja e saj është një humbje e madhe për artin shqiptar. “Është një humbje e madhe. Ka qenë një nga aktoret më të shquara. Kishte një pasion të madh dhe dashuri për teatrin. Para disa ditësh kur e takova më tha që po përsëriste tekstin e dramës “Përjetësisht dashuria...” sepse donte të rikthehej në skenë. Ishte e sëmurë nga këmba, por nuk e mendonte se kjo do t'i merret jetën”, pohon regjisori Luarasi.

Aktorja Drita Pelinku gjithmonë në jetën e saj artistike ka theksuar dashurinë e saj për filmin dhe tetarin. Por ajo ka qenë dhe pikë referimi për aktorët e rinj, të cilët shikonin tek ajo jo vetëm talentin, por dhe dashurinë e madhe për artin. Ndër rolet më të spikatura ja vlen të përmenden ai i hallës te “Njeriu me Top”, roli i Budes në filmin "Kur hidheshin themelet", etj.

Homazhe në nderim të aktores Pelinku zhvilloi në Teatrin Kombëtar edhe Ministja e Kulturës, Mirela Kumbaro. “Jo më larg se dje po shikoja në arkiv shënimet që kam nxjerrë kur e kam ndjekur Drita Pelinkun në jetën e saj artistike dhe ajo thoshte se dëshira e saj ishte të linte gjurmë të punës dhe të dashurisë. Ky është një testament që e ka realizuar dhe që ne tani kemi detyrën ta ngrejmë në monument sepse ajo e meriton plotësisht”, tha Kumbaro.

Si aktore e teatrit dhe kinematografisë Pelinku numëron mbi 150 role, ndër të cilët më shumë se gjysma janë kryerole femërore të dramaturgjisë kombëtare dhe botërore. Si një nga themeluest e Teatrit Kombëtar ajo ka dhënë një kontribut të rëndësishëm është si autore e shumë botimeve biografike për artistë të skenës shqiptare. Për kontributet e saj të veçanta Drita Pelinkut i është akordua titulli “Mjeshtre e madhe”, “Çmimi i Karrierës” dhe gjithashtu titulli “Artiste e Merituar”. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin