03/10/2013 07:42:23

Vdes Tom Clancy, shkrimtari i spiunazhit

Shkrimtari ishte autor i romaneve best-seller

WASHINGTON - Tom Clancy, autori amerikan i romaneve të spiunazhit tejet të detajuara teknikisht vdiq në moshën 66 vjeçare, njoftoi sot e përditshmja amerikane "New York Times", duke cituar botuesin e tij. Shkrimtari ishte autor i romaneve best-seller si "Në Ndjekje të Tetorit të Kuq", "Nën Urdhër" apo "Lojëra Lufte".

"Ai vdiq dje në spitalin 'John Hopkins' në Baltimore pas një sëmundjeje të shkurtër", theksoi e përditshmja "Baltimore Sun". Tom Clancy është iniciatori i zhanrit të thrillerit teknik që trajton në veprat e tij tepër të dokumentuara teknologjikisht temat e terrorizmit bërthamor e bakterologjik dhe të spiunazhit industrial apo shtetëror.

Tom Clancy, emri i vërtetë i të cilit ishte Thomas Lanier Clancy Jr. ndoqi studimet për gjuhë angleze në "Loyola College" para se të bëhej në vitin 1969, ndërmjetës sigurimi.

Pasi dështoi të integrohej në ushtri për shkak të shikimit të keq, ai filloi të shkruante në kohën e tij të lirë. Republikan i deklaruar, Tom Clancy ishte një shkrimtar shumë i pasur, bashkëpronar i ekipit të bejsbollit "Baltimore Orioles". Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin