02/10/2013 13:01:47

''Dyrrhachium'' sjell Dizdarin dhe Mendelson në Amfiteatër

Dy vepra nga Felix Mendelson dhe Limoz Dizdari bënin pjesë në programin e përzgjedhur nga instrumentistët

DURRES - Trioja instrumentale "Dyrrhachium" interpretoi mbrëmjen e kaluar në mjediset e galerisë veriore të amfiteatrit antik të Durrësit (foto), në kuadër të ditës së tretë të Festivalit të Tetë Ndërkombëtar të Muzikës së Dhomës. Dy vepra nga Felix Mendelson dhe Limoz Dizdari bënin pjesë në programin e përzgjedhur nga instrumentistët e këtij grupi, që paraqitet në jetën kulturore-artistike shqiptare që nga viti 2009. Pianistja Merita Rexha Tërshana, e njohur edhe për veprimtarinë e saj edhe si soliste; violinistja Nevila Kalaja, e cila përveç impenjimit si instrumentiste ka ideuar dhe drejtuar që nga fillimi Festivalin e muzikës së dhomës dhe Aristidh Prosi në violonçel, me një përvojë shumëvjeçare si solist në Orkestrën e Radiotelevizionit Shqiptar, sollën në monumentin më të madh të antikitetit në Shqipëri Trion op.49 në katër kohë nga kompozitori gjerman Felix Mendelsohn (1809 – 1847). Artistët e njohur krijuan një atmosferë të këndshme muzikore, duke përcjellë te dëgjuesit vlerat e një vepre të shkruar thuajse dy shekuj më parë. Të hënën e ardhshme në të njejtin mjedis koncertal do të interpretojnë artistët e trios së frymës "Durrësi". Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin