01/10/2013 16:56:04

Thesari që Serbia duhet t'ia kthejë Kosovës

Të mbrojmë trashëgimisë kulturore të luajtshme

PRISHTINË - Thesari i rëndësishëm i Kosovës, që gjendet në Serbi, duhet të rikthehet në truallin e vet, tha ministri kosovar i Kulturës, Rinisë dhe Sporteve, Memli Krasniqi, në hapjen e konferencës ndërkombëtare "Mbrojtja e trashëgimisë kulturore të luajtshme”, në Prishtinë, ku filluan dje aktivitete për shënimin e Ditëve të Trashëgimisë Evropiane 2013. Sipas tij, autoritetet serbe duhet të gjejnë mënyra për t’i sjell këto artefakte aty ku edhe e kanë vendin.

"Një thesar tepër i çmuar i trashëgimisë kulturore të Kosovës gjendet për vite me radhë në Serbi dhe autoritetet e atjeshme edhe pas 14 vitesh, nuk kanë treguar vullnetin për t’i kthyer ato në vendin dhe shtëpinë e tyre, pra, në Muzeun e Kosovës”, ka thënë ministri Krasniqi.

Duke përmendur faktin se në vitet e fundit trashëgimia kulturore është trajtuar si një prioritet i veçantë, ministri tha se tashmë është formuar grupi punues për hartimin e Strategjisë Kombëtare për Trashëgiminë Kulturore. Ai e vlerësoi si shumë të rëndësishme konferencën, ku mund të shkëmbehen përvojat më të mira të punës rreth trashëgimisë kulturore.

Nga ana tjetër, Tim Cartwright, udhëheqës i zyrës së Këshillit të Europës në Prishtinë, u shpreh se vendet ballkanike posedojnë një trashëgimi kulturore tejet tërheqëse. Ai tha se KE-ja ka një bashkëpunim shumë të mirë me MKRS-në.

Ndërsa, Gjejlane Hoxha, drejtoreshë e Këshillit të Kosovës për Trashëgimi Kulturore, tha se Kosova është një vend me pasuri kulturore, dhe ajo kërkon të mbrohet nga të gjithë aktorët.

Po ashtu dje, në Muzeun e Kosovës, u prezantua projekti “Arka Arkeologjike dhe Etnologjike e Kosovës” përmes të cilit personat me nevoja të veçanta përmes shqisave të tyre do të kenë mundësinë të përjetojnë Muzeun. Zv/ministri i Kulturës, Hajdin Abazi, ka thënë se, “përmes këtij projekti trashëgimia e jonë kulturore po bëhet e mundur për të gjitha kategoritë e popullit tonë”. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin