29/09/2013 21:25:30

Skulptura e lehtë

Shqiptari Miloti merr pjesë në një tjetër ekspozitë

ITALI - Nga data 5 deri më 10 dhjetor 2013 do të mbahet në Cerrina të Italisë ekspozita e titulluar “Lehtësia e skulpturës” , ku ndër shumë artistë ndërkombëtarë do të marrë pjesë edhe shqiptari Alfred Milot Mirashi.

Ky është edicioni i tetëi kësaj ekspozite me përmasa ndërkombëtare që do të mbahet në Parkun e Artit në Cerrina, një ambjent i qetë dhe relaksues ku elementi natyral dhe ai artistik shkrihen mes tyre duke krijuar një atmosferë magjike . Veprat e 13 artistëve ndërkombëtarë japin një ide gjithëpërfshirëse mbi artin e skulpturës së viteve të fundit me një kujdesje të veçantë për gjuhët heterogjene dhe veçoritë e shumta artistike që karakterizojnë dhe dallojnë secilin prej skulptorëve.

Për më tepër fakti që artistët vijnë nga shtete të ndryshme përbën një tjetër mënyrë krahasimi mes eksperiencave të ndryshme , shpesh herë shumë fryt-dhënëse në fushën e artit. Temat e trajtuara janë krejtësisht të përzgjedhura nga vetë artistët , shprehje direkte e fantazisë dhe ndjeshmërisë së secilit prej tyre. Përsa i përket përfaqesuesit të vetëm të Shqipërisë, Alfred Mirashi, do të ekspozohet vepra e tij “çelesi” .

Në veprën e Mirashit, çelësi kthehet në një shprehje të elementit social dhe kolektiv, simbol i artit të çdo epoke që përfaqëson kolektivitetin. Ajo interpretohet si zgjidhja simbolike e integrimit social, kulturor, fetar dhe racial që po përjeton Europa në këtë periudhë, ku edhe vetë artisti, emigrant shqiptarë prej njëzet vitesh, bëhet protagonist në vetë të parë i gjithë mesazhit artistic dhe kulturor që përcjell me anë të veprës së tij, çelësit. Celësit që është gjithashtu metaforë e lirisë dhe e hapjes ndaj kulturave të reja. Na ndiqni dhe në Facebook dhe Twitter

Daniela Vathi

Dërgo me email | Stampo artikullin