27/09/2013 10:23:52

Kruja, qyteti i muzeut modern 240 vjeçar

Në mjediset e godinës janë vendosur monitorë touch screen për të informuar vizitorët me një sërë elementësh historikë

KRUJË - Vizitorët e muzeut etnografik të Krujës (foto) prej disa ditësh kanë mundësi të njihen me guidën dhe profesionet e traditës në qytet, me anë të monitorëve dhe ekranëve televizivë të instaluar në mjediset e tij. Gjithçka është realizuar falë projektit të përbashkët me Agjencinë turke TIKA, tha drejtori i muzeve, Medi Hafizi. Në mjediset e godinës 240-vjeçare ndodhen dy monitorë touch screen, që mundësojnë informimin e vizitorëve me një sërë elementësh historikë dhe tradicionalë të objekteve të ekspozuar në muze. Turistët vendas dhe të huaj mund të ndjekin në tetë ekrane televizive shfaqjen e fotove të hershme të punishteve dhe mjeshtrave të gdhëndjes, endjes së sixhadeve apo të zejeve të tjera të trevës së Krujës. 10 manekinë me kostume popullore, të përgatitura nga etnografja Afërdita Onuzi, janë pjesë e ndryshimeve pozitive në muze, tha Hafizi. Projekti, realizuar nga TIKA, në vlerën e 33 mijë eurove, i ka shërbyer rritjes së interesimit të turistëve për muzeun etnografik.

HermesNews - ©2013

Dërgo me email | Stampo artikullin