17/09/2013 17:11:22

''Kleçka'', lirohen të pandehurit

Shpallën të pafajshëm dhjetë të pandehur, mes tyre dhe një deputet

PRISHTINË - Dhjetë të pandehurit e rastit “Kleçka”, mes tyre deputeti Fatmir Limaj, sapo u shpallën të pafajshëm dhe dolën nga Gjykata Themelore në Prishtinë, e cila në 3 shtator u ndërpreu masën e arrestit shtëpiak.

Dhjetë ish-pjesëtarët e UÇK-së ishin akuzuar për krime lufte, bazuar kryesisht në dëshmitë e "Dëshmitarit X" - Agim Zogaj, tani i ndjerë.

Limaj dhe të tjerët po për këto akuza hetoheshin nga një prokuror i EULEX-it. Limaj më parë ishte liruar nga Tribunali i Hagës. Akuzat ishin rrëzuar nga një proces gjyqësor i mbajtur në Kosovë dhe më herët po në Prishtinë, por dosja ishte rikthyer për rigjykim nga një trup gjykues në Gjykatën Supreme.

EULEX njoftoi se këtë pasdite në Gjykatën Themelore të Prishtinës, një trup gjykues i përbërë nga dy gjyqtarë të EULEX-it dhe një gjyqtar kosovar, i kryesuar nga një prej gjyqtarëve të EULEX-it, i liroi të pandehurit Arben Krasniqi, Naser Krasniqi, Naser Shala, Nexhmi Krasniqi, Fatmir Limaj, Behlul Limaj, Shaban Shala, Sabit Shala, Besim Shurdhaj dhe Refki Mazreku nga akuzat për Krime Lufte dhe veprat e tjera të ndërlidhura në të ashtuquajturin rasti “Kleçka”. Po ashtu, trupi gjykues e ndërpreu masën e paraqitjes në stacionin e policisë për të gjithë të pandehurit dhe urdhëroi që atyre t’u kthehen pasaportat e tyre.

Trupi gjykues konsideroi se lënda e Prokurorisë mbështetej kryesisht në pohimet e dëshmitarit të mbrojtur, Agim Zogaj, tani i ndjerë. Trupi gjykues vendosi që dëshmia e tij në disa pika të rëndësishme nuk është e vërtetueshme.

Çështja kryesore mbetet identiteti i personave për të cilët ai pohon se i kanë kryer veprat që u ngarkohen. Kjo, nuk është vërtetuar me dëshmi të besueshme dhe të pavarura dhe është në mospërputhje dhe e kundërshtua nga dëshmitë e tjera. Në përgjithësi, Trupi gjykues vlerësoi se, në aspektet materiale më të rëndësishme, dëshmia e Agim Zogaj ishte tërësisht e pabesueshme dhe se do të ishte e pasigurt po të bazoheshin në të, për t’i dënuar të pandehurit për veprat nga aktakuza.

Aktgjykimi me arsyetimin e plotë do të dorëzohet brenda tridhjetë ditëve. Rastin e ka ndjekur penalisht një prokuror i EULEX-it nga Prokuroria Speciale e EULEX-it. Të gjitha palët kanë të drejtë ankese.

Përmes një deklarate për mediat, zyra e shtypit pranë Kryeministrit kosovar bëri të ditur të martën se Thaçi ka vlerësuar se me këtë proces gjyqësor u dëshmua edhe një herë pastërtia e luftës së drejtë të Ushtrisë Çlirimtare të Kosovës. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin