04/09/2013 08:18:39

Pjeshka Melba

nga Brunhilda Çela

Sekretet e aromave të Brunhildës Këtu po ndaj me ju një recetë (foto) që bëra dje pas dreke të thjeshtë e të dëgjuar në gjithë botën, por mbi të gjitha e shpejtë dhe e shijshme. Emrin ky desert e ka marrë prej sopranos së operas australiane Helen Porter Micell, e njohur si dama Neli Melba. Emrin e saj e kanë marrë disa pjata si: ''Melba Toast'', ''Pjeshka Melba'' dhe ''Salca Melba''.

Ka disa receta të ndryshme për këtë desert klasik, në disa receta pjeshka zihet pak në ujë me sheqer, lëng limoni e esencë vaniljeje e pastaj piqet në zgarë me pak gjalpë.

Në disa receta përdoren kompostot e gatshme të pjeshkëve: unë këtë recetë e preferoj me pjeshkë të fresketa pra e bëj vetëm në kohën që pjeshkët kanë sezonin dhe më pëlqen ta pjek direkt në furrë pjeshkën në proçesin e zgarës me pak gjalpë e pak sheqer ose mjaltë por dhe në tigan zgarë mund ta piqni. Pjeshkët mundesisht t'i zgjidhni të forta, jo shumë të buta.

Për salcën e mjedrave nuk është problem, mund ta bëni me mjedra të freskëta ose të ngrira të cilat i zieni shumë pak me pak sheqer dhe i kaloni pastaj në siten e guzhinës që të përfitoni një salcë pa fara.

Në pjatë e servirni me gjysmat e pjeshkëve të pjekura, salcën e mjedrave dhe akullore me vanilje e ca mjedra për zbukurim. Mund t'i vini pak krem pana të rrahur, bajame lart.

Eshtë një ndër të perferuarat e mia, por vetëm në sezonin e pjeshkëve me pëlqen, (apo s'janë këtu ato pjeshkët e fshatit aq të mira e aromatike).

Pjeshkëve mund t'ia hiqni lëkurën duke i futur në ujë të valuar më parë ose pasi janë pjekur (u hiqet lehtësisht pas pjekjes). Mua më pëlqen e gjitha me lëkurë, nuk ia heq. Provojeni dhe keni për t'u kënaqur ! Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin