19/08/2013 09:25:29

Muffins me manaferra

nga Brunhilda Çela

Sekretet e aromave të Brunhildës Kjo recetë e sotme ishte një sajim i momentit. Në mëngjes dola herët shëtitje e mblodha gjithë ato manaferra. Manaferrat janë në një vend shumë të pastër, afër pyllit e buzë vreshtave.

Përveç kënaqësisë që ndiej gjatë mbledhjes dhe vetë shëtitja e soditja e atij peisazhit mua më shlodh. E duke u ndier e e relaksuar më fillon frymëzimi për diçka të mirë në guzhine. Po mendoja se çfarë të bëja, si fillim një parfe me manaferra ose tartë, por ndërrova mendje thashë mini-kekë të vegjël e me krem manaferrash lart.

Receta ime për minikek është një recetë që e përdor shpesh. Masat e mia janë:
1 gotë e gjysëm miell
1/2 gotë niseshte
1 gotë sheqer
150 ml vaj
250 ml kos
1/2 pako pluhur pjekës
lëkura e 1 limoni
Aromë vaniljeje (përdor gjithmonë sheqerin e aromatizuar me bishtajë vaniljeje të vërtetë bourbon nuk preferoj vaniljen artificiale nuk ia duroj dot erën, ka shumë ndryshim për mua me vaniljen e vertete).
1 filxhan çaji plot me manaferra të egra
Me këto masa mua me dolen 28 copë mini-kek. Për kremin bëra dy lloje kremerash:























Në fillim zieva rreth 300 gr manaferra me 1 filxhan kafeje sheqer, pa ujë fare dhe e kalova në sitën e guzhinës, që të përfitoja një pure manaferrash të imët e pa fara që ta përdorja për kremin. Mascarpone kisha rreth 400 gr.

Pastaj unë bëra gjysmën e kremit me maskarpone të përzier me sheqer pluhur (sheqerin ia hodha me sy) dhe purenë e manaferrave, ndërsa për kremin e gjalpit përdora metodën e marenges italiane me gjalpë, sheqer pluhur dhe të bardhë veze, ujë por në vend të ujit mora shurup të trashë manaferrash.

Këto ishin masat që përdora unë:
250 gr. gjalpë
4 te bardha vezesh
125 ml shurup manaferrash


Përgatitja e marengës italiane të ha shumë kohë dhe duhet patjetër të keni një termometër që shurupi të arrijë temp. 125 gradë celsius.

Për përgatitjen e marengës italiane shikoni këtë videon këtu.

Unë vetëm nuk përdora ujin me sheqer por shurup të trashë manaferrash.
Por nese nuk doni te beni nje procedure kaq te gjate merrni thjesht sheqer pluhur perzijeni me gjalpin dhe me marmalate manaferrash te holluar me pak uje ose liker manaferrash.

Përgatitja: Miellin e përzieva me pluhurin pjekës dhe niseshtenë. Të gjitha të tjerat përveç manaferrave i vura në një enë plastike dhe i rraha me mikser. Pastaj e përzieva me miellin me lugë druri. I vura dhe manaferrat dhe i perzieva. Sobën e ndeza më parë të ngrohet në 200 gradë.

Hedh brumin në format të minikekëve por jo shumë brumë. Unë përdora lugën e madhe të akullores e kudo kisha të njëjtën masë, pra një lugë akulloreje në çdo formë se nuk duhet të ketë shumë brumë e të fryhen tepër.

Pasi u poqën rreth 20 minuta, i hoqa i lashë të ftohen. Kremerat unë i bëra në fillim e i lashë në frigorifer, pastaj fillova të dekoroj minikeket me krem sipas qejfit tim.

Lashë dhe katër copë pa dekor, i preva në 3 copë tërthore çdo min-kek e i shtrova në gotë me kremin mascarpone se kisha shumë. Një shtresë kek, vura reçel manaferrash mascarpone, manaferra të fresketa, prape kek, prapë reçel, maskarpone e manaferra të freskëta. Mund t'i vini me reçel sipër. Ju bëftë mirë ! Na ndiqni dhe në Facebook

HermesNews - ©2013

Dërgo me email | Stampo artikullin