11/08/2013 07:57:29

Patate të furrës me erëza dhe miell misri

nga Brunhilda Çela

Sekretet e aromave të Brunhildës I kushtova një album të tërë këtij specialiteti për ta patur në arkivin e faqes pasi ia vlen. Kur ta provoni do e shikoni sa shumë pëlqehet prej fëmijeve. Mund ta keni parë shpesh në recetat e mia të serviruara si shoqëruese të ndonjë mishi a shpendi, por sot i bëra sade dhe me erëza të freskëta pasi shyqyr zotit erëzat në ballkon nga dielli i madh që po bën janë në formë.

Eshtë një recetë e thjeshtë e shpejtë. Do thoja mund ta përdorni në vend të patateve të skuqura për fëmijët pasi pinë më pak lyrë dhe dalin krokante jashtë e shumë të buta brenda.

Unë vjet e hasa këtë specialitet rastësisht tek një komshija ime boshnjake cila më kishte thirur për bajram e më kishte bërë mish qengji me këto patate.

Ajo nuk u kishte vënë shumë erëza vetëm kripë, piper e miell misri. Unë, kur e provova për herë të parë, e ndryshova duke e bërë me përzierjet e mia të erëzave. Sot përdora vegete natyrale, e theksoj natyrale pa glutamat natriumi, bojë kimike etj etj. Ka rëndësi kjo pasi vegetën e zakonshme nuk e përdor. Vegeta natyrale përmban qepë të thata, kripë, karota të thata, rrënjë majdanozi, pastinake, selino të thatë, presh të thatë, majdanoz gjethe të thatë etj etj. Këto bluhen dhe përzihen me kripën, mund ta përgatisim dhe vetë tani që dielli është i fortë pasi thahen shpejt.

Ndërsa vegeta e zakonshme ka përforcues shijesh kimik që nuk është aspak i shëndetshëm. Unë i shtova dhe rozmarinë të freskët dhe rigon (nga Shqipëria, e theksoj dhe këtë fakt se rigoni shqiptar është ai më aromatiku nga të gjitha sa kam provuar deri tani). Mund të vini dhe erëza të tjera sipas shijes suaj.

Patatet e mëdha i pres në 4-esh, i përziej me erëzat dhe një dorë miell misri. Furrën e nxeh në 250 gradë dhe në furrë vë tavën me vajin të nxehtë, kur vaji nxehet i vë patat me kujdes që të gjitha të kenë kontakt me tavën.

Sapo piqen nga një anë i kthej me mashën e guzhinës nga ana tjetër dhe kur janë pjekur të dyja anët i heq gjithesej rreth 25 minuta. I shoqërova me salcë kosi e sallatë verore. Kjo ishte dreka ime sot e shpejtë dhe jo e rëndë.

HermesNews - ©2013

Dërgo me email | Stampo artikullin