04/08/2013 11:34:17

Rriten aksidentet në trafik

Klinika Emergjente e Qendrës Klinike Universitare e Kosovës në raportin gjashtëmujor të punës konstaton shtim të rasteve që kërkojnë ndihmën mjekësore

PRISHTINË - Instituti kombëtar i shëndetësisë publike rekomandon një plan të veprimit për parandalimin e aksidenteve dhe aprovimi me procedura urgjente nga Parlamenti i Kosovës.

Ky institut deklaroi se, "po përcjell në mënyrë permanente situatën epidemiologjike të aksidenteve në trafik", duke theksuar se statistikat e Policisë së Kosovës flasin për rritje prej 3 për qind në gjashtëmujorin e parë të këtij viti.

Klinika Emergjente e Qendrës Klinike Universitare e Kosovës në raportin gjashtëmujor të punës konstaton shtim të rasteve që kërkojnë ndihmën mjekësore si pasojë e aksidenteve në trafik dhe se numri i tyre ishte 763.

"Instituti Kombëtar i Shëndetësisë Publike të Kosovës shpreh shqetësimin lidhur me rritjen e numrit të aksidenteve për muajin korrik dhe javën e parë të muajit gusht, ku si pasojë kanë vdekur 10 persona që paraqesin shifra alarmante", theksohet në komunikatë.

Ekspertët e Institutit "alarmojnë dhe paralajmërojnë se nëse nuk merren masa urgjente, humbja e pritshme e jetëgjatësisë së banorëve do të jetë e madhe".

HermesNews - ©2013

Dërgo me email | Stampo artikullin