27/07/2013 17:06:47

Vizat e sportistëve: ende asnjë përgjigje

Në qoftë se zyrtarët e klubit nuk krijojnë mundësinë e hyrjes në kohën e duhur me viza transit për Skënderbeun, nuk përjashtohet mundësia që UEFA të kërkojë që kjo ndeshje të luhet në një stadium të një vendi tjetër

KORÇË - Kampioni aktual i Shqipërisë, Skënderbeu, ndeshjen e parë me ekipin Shakhter Karagandy per turin e 3-te eleminator te Liges se Kampioneve do ta luajë në 30 korrik në kryeqytetin e Kazakistanit, ndërsa një javë më pas, në 6 gusht, do të luhet ndeshja e kthimit në stadiumin kombetar "Qemal Stafa" në Tiranë, pasi stadiumi i Korçës nuk përmbush disa kushte të rëndësishme të UEFA-s.

Zyrtarisht skuadra e Shakhter ka kërkuar shtyrjen e ndeshjes për të mërkurën, por është kundërshtuar nga UEFA qe ka kërkuar që takimi të luhet në datën e planifikuar që në hedhjen e shortit. Kazakistanasit kanë kërkuar shtyrjen e ndeshjes me Skënderbeun për arsye se të dielën luajnë takimin e radhës për kampionat.

Koha e pakët nga ndeshja me azerët tek kjo me kazakistanasit i ka detyruar zyrtarët e skuadrës korçare të mbyllin procedurat për të marrë viza hyrëse në kryeqytetin kazakistanas. Për lëvizjen e Skënderbeut në këtë mënyre ka dijeni edhe UEFA qe ka vënë në dijeni edhe ekipin më të cilin do të luajnë korçarët. Por, deri tani të paktën për zyrtarët e Skënderbeu akoma nuk ka një përgjigje nga kazakistanët e Shakhter.

Në qoftë se zyrtarët e klubit nuk krijojnë mundësinë e hyrjes në kohën e duhur me viza transit për Skënderbeun, nuk përjashtohet mundësia që UEFA të kërkojë që kjo ndeshje të luhet në një stadium të një vendi tjetër europian. Kazakistanasit i kanë bërë të ditur menaxherit të skuadres korçare, Gerhard Takaj, se duhet të gjejnë vetë edhe autobuzin për të lëvizur nga aeroporti në drejtim të hotelit dhe stadiumit, pasi ata janë të gatshëm të sigurojnë vetëm mjetin e policisë që do të shoqëroje Skënderbeun dhe asgjë tjetër.

HermesNews - ©2013

Dërgo me email | Stampo artikullin