22/07/2013 13:36:06

Gratë, 26 % sipërmarrje ekonomike

Ndër arsyet që pengojnë përhapjen dhe zgjerimin e bizneseve të grave konsiderohen disa pengesa, ndër të cilat janë burime financiare të kufizuara, rol në familje kushtëzues për nisjen dhe zhvillimin e një biznesi cdhe ndonëse cmohet aftësia e tyre në administrimin e financave familjare

TIRANE - Edhe pse kusht për fuqizimin ekonomik dhe faktor për emancipim, gratë në Shqipëri vetëm në 26% të tyre drejtojnë sipërmarrje ekonomike. Ndër arsyet që pengojnë përhapjen dhe zgjerimin e bizneseve të grave konsiderohen disa pengesa, ndër të cilat janë burime financiare të kufizuara, rol në familje kushtëzues për nisjen dhe zhvillimin e një biznesi cdhe ndonëse cmohet aftësia e tyre në administrimin e financave familjare, meshkujt zotërojnë "timonin" e ekonomisë.

Sipas INSTAT, 18% e menaxherëve të bizneseve private janë gra, por me diznivele në shpërndarje gjeografike dhe vetëm 61% e bizneseve të grave janë në rajonet Tiranë dhe Elbasan, kryesisht në tregti, profesione të lira, bujqësi dhe rrobaqepësi. Edhe pse sistemi bankar tregohet i gatshëm të financojnë projektet e grave, vendos dhe kushtin që kredia jepet vetëm pasi ato të kenë 2 vjet që kanë ngritur biznesin, thuhet në një studim të "UN Women"-Shqipëri.

Sektori i bujqësisë që siguron më shumë mundësi punësimi për gratë, nuk shënon pozicione të favorshme të tyre dhe ndonëse punojnë më se 50% e grave rurale, vetëm 6% e fermave menaxhohen prej tyre.

Në strategjinë e zhvillimit të Ndërmarrjeve të Vogla dhe të Mesme, parashikohet që në vitin 2020 gratë në Shqipëri do të duhet të arrijnë të drejtojnë rreth 35% të bizneseve, ndërsa niveli i kredive për to të arrijë në 20% ndaj totalit.

Në botë gratë zënë 40.3% në tregun botëror të punës, 7.6% e tyre mbajnë postet më të paguara në 500 kompanitë më të pasura, 14.4% postin e drejtueses ekzekutive në këto kompani dhe vetëm 16.1% drejtojnë bordet.

Në Shqipëri mungon ende një studim mbi praninë e grave në këshillat e administrimit e drejtimit të kompanive private dhe publike.

HermesNews - ©2013

Dërgo me email | Stampo artikullin