20/07/2013 11:03:00

Spektakël dhe muzikë italiane në Vlorë

Stilitët italian në Vlorë

VLORË - Konsullata e Përgjithshme e Italisë, në Vlorë, do të organizojë në këtë qytet, një aktivitet në qendër të të cilit do të jenë moda dhe muzika. Aktiviteti, i planifikuar për tu zhvilluar në 29 korrik, në shëtitoren “Pavarësia”, do të ketë si protagonistë dy figura të njohura në këto fusha në Itali; Antonio Maggio, kantautor dhe stilistin Francesco Paolo Salerno.

Antonio Maggio, kantautor i ri, tashmë është shndërruar në një idhull për të rinjtë italianë. Ai ka fituar Festivalin Sanremo Giovani 2013, ndërkohë që ka qenë fitues i edicionit të parë të X-Faktor në Itali. Ai përfshihet mes atyre kantautorëve të rinj si Simone Cristiçhi, Max Gazzé, apo Daniele Silvestri, të cilët në profilin e tyre artistik, ndërthurin cilësinë e muzikës, me delikatesën dhe kënaqësinë e kompozimeve.

Eleganca dhe finesa veçojnë modën dhe profilin e Francesco Paolo Salerno, stilist italian i afirmuar, i cili do të paraqesë një “fashion show” të vërtetë të vetin me koleksione “pret à porter”, “haute couture” dhe veshje nusesh. Dy prej krijimeve të tij janë ekspozuar së fundi në tempullin e modës “Cristobal Balenciaga Museoa” gjatë ekspozitës së fashion photographer, Joseph Cardo.

Këtij aktiviteti do t’i paraprijë një natë më parë eventi privat i rezervuar për autoritete dhe eksponentë nga bota e shtypit dhe e kulturës, organizuar nga Konsullata e Përgjithshme e Italisë në bashkëpunim me titullarin, Z. Alfo Giorgi, ku do të prezantohet “fashion show” i Francesco Paolo Salerno dhe do të performojë këngëtari Antonio Maggio.

HermesNews - ©2013

Dërgo me email | Stampo artikullin