20/07/2013 10:38:48

''Shtëpia e Bernarda Albës'' shfaqet në Butrint

E parë nën intrepretimin e Trupës Kombëtare të Teatrit kombëtar në Tiranë, ''Shtëpia e Benarda Albës'', në Butrint u ndoq me admirim dhe mori duartrokitje pafund

SARANDË - Në ditën e dytë të Festivalit Ndërkombëtar të Teatrit, në Butrint, u shfaq mbrëmë ''Shtëpia e Bernarda Albës'', me regji të Irina Kouberskaya dhe Hugo Perez, nën interpretimin e kompanisë teatrore ''Tribunët'' nga Madridi, Spanjë. Fuqishëm zbriti trishtimi në muret antike të teatrit të Butrintit, sapo dritat mbi skenë zbuluan skenografinë e dramës së Frederiko Garsia Lorkës. Zëri i Alfred Bualotit përcolli nga brendia e publikut atë çka do të ndodhte në skenë për dy orë. Aktoret e talentuara Carmen de la Pica, Chelo Vivares, Natalia de Azcarate, Xandra Navarro, Matilde Juarez, Katarina de Azcarate, Ana Piero, Marina Valverde dhe Luisa Garcia, nën magjinë dhe muzikalitetin e fjalës në spanjisht, mbajtën për dy orë publikun të mbërthyer në shkallët e gurta. E parë nën intrepretimin e Trupës Kombëtare të Teatrit kombëtar në Tiranë, "Shtëpia e Benarda Albës", në Butrint u ndoq me admirim dhe mori duartrokitje pafund. Kritiku i artit, Josif Papagjoni, në fund të shfaqjes pohoi se fjala e aktorit zotëroi skenën dhe dialogu mes tyre mbajti të ngërthyer publikun.

HermesNews - ©2013

Dërgo me email | Stampo artikullin