20/07/2013 10:21:57

Bërxolla qingji me turli verore

nga Brunhilda Çela

Sekretet e aromave të Brunhildës Kjo ishte dreka e sotme që u bë shumë shpejt. Bërxollat (ose Kotoletat që i thonë ndryshe) i kisha në ngrirës dhe i nxora që në darkë jashtë frigoriferit.

Mora patëllxhanët që kisha në frigorifer e ca speca gjysëm djegës që i pata blerë javën e kaluar, i lava, i pastrova, i preva në copa të vogla.Patëllxhanët mund t'i vini më parë në kripë ose në ujë me kripë t'u dalë e hidhura, por unë nuk e bëra.

Në një tavë vura patatet e reja të vockla, të lara mirë. I thava me pecetë dhe i vura të piqen me vaj ulliri, kripë dhe gjatë pjekjes u hodha ca degë rozmarinë.

Ndërkohë që patatet piqeshin në një tigan të madh, vura vajin e ullirit të ngrohet pak, hodha patëllxhanët e specat të kavërdisen lehtë dhe kur ato fillojnë të zbuten, shtova 4 domate të qëruara nga lëkurat dhe të prera hollë bashkë me hudhrat dhe u dhashë ca valë por jo të bëhen dru, të jenë të buta po edhe të ngelen bukur e mos të prishen. Në fund fare i vura pak rigon dhe gjethe borziloku.

Kotoletat i kriposa shumë pak, i vura piper, vaj ulliri dhe dega rozmarine, i poqa nga të dyja anët në një tigan zgare por jo të thahen.

Pasi mbaroi pjekja u shtova kripë përsëri ngaqë i vë shumë pak më parë ose shpesh nuk i vë fare, në fund fare ia hedh kripën.

E servira në pjatë ku shtrova turlinë dhe patatet gjithashtu anash, doli shumë e shijshme dhe me patatet e pjekura shkonte shumë. Ju bëftë mirë nëse e provoni. Mendoj dhe me një biftek apo fileto peshku të skuqur lehtë në vaj ulliri duhet të dalë e shijshme.

HermesNews - ©2013

Dërgo me email | Stampo artikullin