10/07/2013 09:14:47

Ashton sot ne Prishtine

Vizita e Baroneshës Ashton në Serbi dhe Kosovë pason takimin e saj të hënën në Bruksel në raundin e 13-të në nivel të lartë politik

PRISHTINË - Përfaqësuesja e Lartë e Bashkimit Europian për Politikë të Jashtme dhe Siguri, Catherine Ashton, takon sot në Prishtinë, krerët shtetërorë të Kosovës, pasi ka takuar dje pasdite ata të Serbisë në Beograd.

Vizita e Baroneshës Ashton në Serbi dhe Kosovë pason takimin e saj të hënën në Bruksel në raundin e 13-të në nivel të lartë politik me kryeministrat Thaçi e Daçiç në procesin dialogut drejt normalizimit të marrëdhëneve mes dy vendeve, kryesuar nga BE e mbështetur nga SHBA.

Në Beograd, Baronesha Ashton paralajmëroi se do takohet sërish me kryeministrat Daçiç e Thaçi, se “bisedimet do të vazhdojnë në javët dhe muajt që janë para nesh” dhe se, “nuk do të ketë pushim veror për të gjithë, sepse duhet të tregojmë përparim”.

Sot paradite në Prishtinë, Baronesha Ashton do zhvillojë takime të veçanta me Presidenten e Republikës së Kosovës Atifete Jahjaga (ora10:30) dhe me Kryeministrin Hashim Thaçi (11:20), sipas axhendës së njoftuar nga Zyra e BE, Presidenca e Kryeministria.

Kryeministri kosovar Thaçi dje pasdite në mbledhjen e Qeverisë tha se në takimin e të hënës në Bruksel, të tretin për zbatimin e marrëveshjes së 19 prillit me Kryeministrin serb Daçiç, janë diskutuar çështjet telekomit dhe energjisë dhe “janë përafruar maksimalisht”, ndërsa “kanë mbetur që disa elemente në të dy tekstet e marrëveshjeve të plotësohen, apo diçka edhe të evitohet”.

Duke theksuar vizitën e Baroneshës Ashton në kryeqytetet dialoguese, Beograd dhe Prishtinë, kreu i Qeverisë së Kosovës tha se, “shpresonte se në ditët e ardhshme do të kemi dakordimin e të dy qeverive sa i përket marrëveshjes së telekomit dhe energjisë”.

HermesNews - ©2013

Dërgo me email | Stampo artikullin