24/06/2013 15:19:11

Supë krem me hudhra

nga Brunhilda Çela

Sekretet e aromave të Brunhildës Përbërësit: 10 thelba hudhra,1 qepë e vogël ,70-100 gr gjalpë, 1,2 l lëng zarzavatesh, kripë, pak piper, tre feta bukë e bardhë, 1 fetë buke e zezë, 3 lugë miell.

Përgatitja është shumë e thjeshtë. Në fillim grijmë imët hudhrat dhe qepën po jo në rende se del e hidhur. I kavërdisim në gjalpë sa të zbuten por jo të digjen. Shtojmë aty miellin dhe kavërdisim edhe disa minuta të tjera.

Pastaj e shuajmë me lëngun e zarzavateve, e lëmë të marrë valë duke e përzier që mos të bëhet kokrra. E lëmë të ziejë rreth 20-25 minuta në nxehtësi të ulët.

Ndërkohë që supa zihet ne merremi me copat e bukës të cilat i presim në katrorë të vegjël dhe i skuqim në një tigan me gjalpë ose vaj ulliri ose thjesht dhe pa lyrë i thekim mirë në tigan pa lyrë.

Pasi ka përfunduar zierja e supës me shkopin magjik e grijmë që të bëhet krem. Në fund fare i shtojmë dhe kremin pana ose mund t'i vëmë creme fraiche. E servirim me bukët e skuqura. Eshtë e thjeshtë por shumë e shijshme ngjan në shije me cervishin tonë që bëjmë me lëng pule. Sigurisht që këtë supë mund ta bëni dhe me lëng pule ose mishi.

HermesNews - ©2013

Dërgo me email | Stampo artikullin