06/06/2013 11:11:48

Artistë nga Shqipëria, Maqedonia dhe Kosova në një ekspozitë piktursh

Organizuar nga Shoqata e artistëve figurativë në Mitrovicë nisi të dielën Kolonia e arteve, në kuadër të manifestimit "Ditët e kulturës", të hapura në 1 qershor - Ditën Ndërkombëtare të Fëmijëve, në teatrin e qytetit më të madh verior të Kosovës

PRISHTINË - Rreth 50 piktura të ndryshme, të realizuara gjatë Kolonisë së artistëve, janë ekspozuar në qendrën e kulturës "Rexhep Mitrovica" në Mitrovicë. Të mbledhur bashkë artistë nga Kosova, Shqipëria dhe Maqedonia kanë vlerësuar punën e mirë që është bërë gjatë katër ditëve sa ka zgjatur kolonia. Kryetari i Shoqatës së artistëve figurativë në Mitrovicë, Tafil Peci, vlerësoi se Kolonia e artistëve këtë vit ka qenë shumë e suksesshme. "Gjitha këto vepra të realizuara kaq mirë nga mjeshtër të njohur të pikturës e të artit, si Buron Kaceli, Mustafë Arapi, Mariana Kaqebeli, e shumë e shumë të tjetër, të cilët me punën e tyre për katër ditë, duke pikturuar në bjeshkët e Shalës, në rrethinat e Mitrovicës dhe në një pjesë të qytetit, na kanë mundësuar që të sjellim një punë madhështore”, u shpreh ai. Në hapje të ekspozitës ishte edhe kryetari i Komunës së Mitrovicës, Avni Kastrati, shefja e Zyrës Administrative në Veri, Adrijana Hoxhiç, etj, të cilët çmuan punën e mirë të artistëve.

HermesNews - ©2013

Dërgo me email | Stampo artikullin