03/06/2013 18:31:18

Vendoset trari i parë i urës 'Ibrahim Rugova'

Ekipi i Bechtel - Enka (GP), Departamenti i Strukturave, ka nisur sot një prej aktiviteteve më të rëndësishme në urën 750 metra të gjatë

PRISHTINË - Sot në mesditë Bechtel Enka GP ka realizuar me sukses instalimin e transportuesit dhe hedhjen-instalimin e trarit të parë të urës më të madhe në projektin e autostradës së Kosovës, Rruga 7 "Ibrahim Rugova".

Ekipi i Bechtel - Enka (GP), Departamenti i Strukturave, ka nisur sot një prej aktiviteteve më të rëndësishme në urën 750 metra të gjatë, e cila kalon mbi zonën industriale dhe konsiderohet zemra e autostradës. Për përfundimin e plotë të kësaj ure do të nevojitet instalimi i 114 trarëve të gjatësisë 38 metra dhe me peshë prej 160 tonë. Kjo urë ndodhet ne seksionin 8 te autostradës.

Momentalisht po punohet me intensitet të plotë në seksionet e mbetura të projektit, 7-8 dhe 9. Bechtel Enka GP njofton se deri në këto momente janë ndërtuar në total 14 ura, 20 mbikalime, 16 nënkalime, ndërsa deri në përfundim të projektit janë per t’u përfunduar edhe 11 mbikalime dhe 6 nënkalime. Projekti i Autostradës së Kosovës nisi punimet në prill 2010 dhe deri tani ka realizuar me sukses hapjen para afateve të 61 km.

HermesNews - ©2013

Dërgo me email | Stampo artikullin