02/06/2013 19:38:31

Nis kolonia e arteve ne Mitrovice

Në Koloni marrin pjesë piktorë nga Kosova, Shqipëria dhe Maqedonia, të cilët ditën e parë kanë punuar në dy grupe, në bjeshkët e Shalës dhe në qytetin e Mitrovicës

PRISHTINË - Shoqata e artistëve figurativë në Mitrovicë ka çelur të dielën Koloninë e arteve, e cila mbahet në kuadër të manifestimit “Ditët e kulturës”.

Në Koloni marrin pjesë piktorë nga Kosova, Shqipëria dhe Maqedonia, të cilët ditën e parë kanë punuar në dy grupe, në bjeshkët e Shalës dhe në qytetin e Mitrovicës.

Sipas axhendës së “Ditëve të kulturës 2013”, Kolonia e Artistëve të Artit Figurativ, mbahet në 2-5 qershor, në fshatrat Bajgorë, Boletin e në Qendrën e Kulturës “Rexhep Mitrovica”.

Kryetari i Shoqatës së artistëve figurativë në Mitrovicë, Tafil Peci, tregon se ky aktivitet tradicional mbështetetet nga Drejtoria e Kulturës e Komunës së Mitrovicës si dhe Ministria e Kulturës e Kosovës.

"Në koloninë këtë vit janë gjithsej 22 artistë nga Kosova, Shqipëria dhe Maqedonia, të cilët janë ndarë në dy grupe dhe do të pikturojnë në Mitrovicë dhe në rrethinë. Të mërkurën, në 5 qershor, ekspozohen të gjitha punimet që janë krijuar gjatë kësaj kohe në qendrën e kulturës “Rexhep Mitrovica” në mbrëmje”, thotë ai.

HermesNews - ©2013

Dërgo me email | Stampo artikullin