31/05/2013 16:04:49

Dy shqiptarë në bienalen e Venecias, jo për Shqipërinë

Anri Sala do të prezantojë Francën, ndërsa Sislej Xhafa nga Kosova do të prezantojë Italinë

TIRANË - Në edicionin e këtij viti të Bienales së Venecias do të jenë dy artistë shqiptarë, por që nuk përfaqësojnë vendin tonë. Anri Sala do të prezantojë Francën, ndërsa Sislej Xhafa nga Kosova do të prezantojë Italinë.

Puna e Salës do të kurohet nga Christine Macel, e cila është marrë edhe më parë me punët e tij. Sislej Xhafën rikthehet në Venecia pas aventurës që pati gjashtëmbëdhjetë vjet më parë, kur i veshur si futbollist, me një flamur shqiptar në shpinë dhe një top futbolli në këmbë, krijoi "pavionin klandestin” në edicionin e 39-të të Bienales së Venecias.

Edicioni i 55-të i Bienales së Venecias hap siparin më 1 qershor deri më 24 nëntor 2013. Për gjashtë muaj, qyteti kthehet në qendrën e debateve dhe risive mbi artin pamor, pasi kjo Bienale është konsideruar gjithnjë si ngjarja më e madhe artistike e kësaj gjinie.

Shqipëria ka marrë pjesë dy herë zyrtarisht në Bienale. Pjesëmarrja e parë zyrtare ishte në vitin 2007 me kuratore Bonnie Clearëater dhe artistët pjesëmarrës ishin Helidon Gjergji, Gent Gjokola, Alban Hajdinaj, Armando Lulaj dhe Heldi Pema.

Hera e dytë ishte në edicionin e 54-të të kësaj bienaleje ku artistët shqiptarë patën sërish një kurator të huaj, italianin Rikardo Kaldura. Artistët që Kaldura zgjodhi për të përfaqësuar idenë që ai i dha ekspozitës “Geopathies” ishin Anila Rubiku, Orion Shima, Gentian Shkurti, Eltjon Valle dhe Driant Zeneli.

Në këtë edicion për herë të parë do të ketë edhe një pavion për Kosovën në të cilën merr pjesë me një instalacion të artistit të ri Petrit Halilaj, nën kujdesin e kuratores Kathrin Rhomberg. Bienalia e Venecias, që nga themelimi i saj në vitin 1895, ka qënë në avangard në promovimin e trendeve të reja artistike.

HermesNews - ©2013

Dërgo me email | Stampo artikullin