29/05/2013 05:48:00

Propaganda fetare ne Kosove

Xhamite dhe kishat, po u zene frymen qendrave

PRISHTINE - Disa vjet më parë në mes të Prishtinës u ndërtua një kishë katolike. Kjo kishë, nuk besoj se ishte një nevojë aq e madhe e shqiptarëve të besimit katolik, sa qe në njëfarë mënyre një simbol se shqiptarët ishin më shumë të orientuar nga Perëndimi, si një mirënjohje ndaj misionarës sonë të madhe Nënës Terezë që populli ynë ia dha njerëzimit. Kjo mendoj se ishte arsyeja e kësaj kishe. Tjetër është çështja se kjo kishë u ndërtua në një vend të ngushtë, duke e ngulfatur kështu frymëmarrjen e qytetit.

Si për çudi, tani kjo kishë e cila kam përshtypjen se u bë nxitje për shqiptarët myslimanë qëedhe ata të kërkojnë të ndërtojnë një xhami. Kërkesa e BIK-ut, komunës së Prishtinës, me në krye Tërnavën ishte që të sigurohej trualli sa më shpejt që të ishte e mundur dhe kërkesa ishte që “trualli të caktohej mu në oborrin e Fakultetit Filizofik të Prishtinës” ( ta sfidonte kishën, e cila është përballë) me arsyetimin se “besimtarët myslimanë s’po kishin vend për t’u falur!”.

Një kërkesë e tillë e Bashkësisë Islame ishte vërtetë absurde, sepse në Prishtinë ka aq shumë xhami sa në ditë festash, kurrë nuk mbushen plot me besimtarë (vetëm në qendër të qytetit janë shtatë a tetë xhami!). Megjithatë, nën këtë pretekst, në emër të “mungesës së xhamive” BIK-u nuk u ndal, por vazhdoi kërkesën duke organizuar protesta, duke manipuluar, duke paguar ose duke i përdorë trushpërlarët për t’u falur edhe në rrugë. Së fundmi, komuna ua caktoi vendin ku mund të ndërtohej xhamia. Jo aty ku kërkuan ata, por edhe kjo mu në qendër të Prishtinës (vetëm nja 200-300 metra larg kishës!), duke e ngulfatur kështu qytetin edhe më shumë, edhe ashtu të mbindërtuar.

Projekti i kësaj xhamie u publikua. Është i njohur tani për të gjithë. Ishte një projekt, që vetëm në Arabi mund ta shohësh. Stil tipik arab, me katër minaret, me nga tre rrathë. Por nuk është vetëm kjo. Një kësi xhamie tanimë është në përfundim e sipër në Mitrovicë. Me përmasa kolosale u përurua tashme vonë edhe në Tiranë. Atje qeveria shqiptare i dha aq shumë publicitet në përurimin e saj, sikur ndërtimi i kësaj xhamie të ishte “shpëtim i kombit”.

Krejt kjo propagandë që po bëhet nuk po bëhet se shqiptarët e besimit islam nuk kanë se ku të falën, siç u tha më lart, por më shumë për shkak të propagandës islamike që po bëhet në Kosovë e Shqipëri nga militantë islamikë të paguar mirë nga qarqe arabe apo turke, për të mbjellë ndikimin arab në trevat shqiptare. Fundja kjo është përpjekje e këtyre qarqeve ekstremiste për t’i dhënë një imazh tjetër Kosovës dhe Shqipërisë, karshi botës perëndimore. Dhe paradoksi tjetër është se kjo po ndodh në kohën kur politikat shqiptare të të dy shteteve si të Shqipërisë po ashtu edhe të Kosovës, synojnë në një të ardhme të shpejtë të futën në familjen e gjerë evropiane.

Një kontribut për të keq po japin edhe mediat tona, sidomos në Kosovë. Klerikët myslimanë, po ashtu edhe katolikët, dyert e televizioneve i kanë të hapura. Mjafton të jetë një rast, ( ndonjë festë fetare) dhe ata i ke në television. Dhe jo vetëm në një television, por gati në të gjithë televizionet e Kosovës. Pse gjithë ky publicitet? Pse gjithë kjo propagandë? Televizionet tona janë bërë si stacion autobusash. Nuk ka asnjë kriter se kush duhet të ftohet në tv. Kush është në vijën kombëtare, e kush po u çon rrymave të errta ujë në mulli? Hyn kush të dojë.

Del kush të dojë. Bile vetë televizionet, kam përshtypjen, se po bëjnë gara se cili po i merr i pari këta faqezinj. Në kohën e ramazanit hoxhollarët, si Naim Tërnava, Bajgora etj, janë standard pothuaj në të gjithë televizionet e Kosovës. Një herë thirren për fillimin e ramazanit, pastaj thirren për Leile Kadër (tri ditë pra Bajramit të Madh kur Kur’Ani ka “zbritur” në tokë!), pastaj natën e Bajramit, pastaj për Bajram të Vogël. Televizionet tona po u japin hapësirë sa të duash. Në disa televizione lokale të Kosovës, që çuditërisht pothuaj s’ka qytet që nuk e ka një të tillë, Iftari bëhet me telvizion, syfyri me television, këndohen “lahi” po ashtu në television. Në kohën e Ramazanit nuk e di njeriu se është në Arabi, Pakistan, Afganistan, apo në Kosovë e Shqipëri!

Fatmirësisht feja tek ne nuk ka pushtet (dhe uroj që kurrë kjo të mos ndodhë) dhe si e tillë nuk ka atë fuqi që njerëzit t’i sanksionojë nëse nuk bëjnë si thotë ajo. Duke e parë se çfarë janë duke bërë në këto kushte pa pushtet, po t’u vinte “koha “ e tyre do ta kishin bërë Kosovën, ndoshta, edhe Shqipërinë një Iran (shtet tipik islamik), Pakistan, apo Afganistan Ballkanik!

Sami Islami

Dërgo me email | Stampo artikullin