10/05/2013 14:53:39

Biblioteka kthehet në qëndër studimore

Rritet numri i lexuesve që frekuentojnë sallat e bibliotekës

GJIROKASTËR - Biblioteka e Gjirokastrës është kthyer së fundmi dhe në një qendër të rëndësishme për studime shkencore, ku studentë dhe pedagogë të Universitetit Eqerem Çabej të qytetit, shfrytëzojnë materialet e shumta që kjo bibliotekë u ofron.

Ndërsa pas viteve 90, numri i lexuesve të antarësuar në bibliotekën “Apostol Meksi”, në qytetin jugor shënoi ulje, aktualisht, numri i lexuesve ka ardhur në rritje.

Sipas drejtoreshës së bibliotekës, Tefta Gjoni, aktualisht, numri i lexuesve këtë vit ka arritur në 3 mijë, nga 2 mijë të tillë që ishin një vit më parë, shifër kjo që rritet nga muaji në muaj.

Gjoni tha se shumica e lexuesve që tërheqin libra janë të interesuar jo vetëm për libra artistikë, por edhe psikologjikë e shkencorë.

“Autorët më në zë të Rilindjes Kombëtare, duke filluar nga Naim Frashëri, Çajupi, e të tjerë shkrimtarë si; Petro Marko, Mitrush Kuteli, Fatos Kongoli, Bashkmi Shehu, poetët e njohur si Dritëro Agolli, Ismail Kadare, Xhevahir Spahiu, Fator Arapi, etj, janë disa nga autorët më të kërkuar, pa harruar edhe poetët dhe shkrimtarët me famë botërore”, tha Gjoni.

Krahas lexuesve nga qyteti, ajo bëri të ditur se tërheqje të librave ka patur edhe nga lexues në zonat rurale, kryesisht nxënës të shkollave të mesme dhe 9 vjeçare, si edhe intelektualë në këto zona.

Biblioteka e Gjirokastrës është edhe një qëndër e rëndëshme për studimet shkencore që kryejnë studentë dhe pedagogë të Universitetit të qytetit jugor, duke u vënë atyre në dispozicion materiale të shumta, dhe me mjaft interes.

Në bibliotekën e Gjirokastrës, ku numërohen rreth 120 mijë tituj librash artistikë dhe shkencorë, funksion edhe një sallë leximi, ndërsa bashkia e ka pasuruar bibiotekën e qytetit me libra të rinj, një pjesë e të cilave i janë shtuar asaj, duke marë në konsideratë edhe preferencat e lexuesve.

HermesNews - ©2013

Dërgo me email | Stampo artikullin