09/05/2013 11:33:58

Ku shiten eksportet shqiptare ?

Që nga viti 1993 gjatë 20 viteve eksportet Made in Albania me Europën kanë shënuar rritje në mënyrë të përvitshme duke arritur vjet në totalin e rreth 202 miliardë lekë nga 11,4 miliardë lekë që ishin në vitin 1993

TIRANE - Europa mbetet kontinenti kryesor me të cilin bizneset shqiptare zhvillojnë këmbimet tregtare, sidomos eksportet "Made in Albania". Një studim i kryer së fundi nga “Open Data Albania" përgjatë viteve 1993-2013 thekson se vjet eksportet me vendet europiane zunë 94.76%, ndërsa 5.24% me kontinentet e tjera. Ndër to kryesojnë eksportet shqiptare me Azinë me 3.62%, Afrika 0.78%, Amerika 0.58%, kontinenti i largët i Australisë me 0.01%, etj.

Që nga viti 1993 gjatë 20 viteve eksportet Made in Albania me Europën kanë shënuar rritje në mënyrë të përvitshme duke arritur vjet në totalin e rreth 202 miliardë lekë nga 11,4 miliardë lekë që ishin në vitin 1993 me produkte të ndryshme.

Ndër to kryeson grupi i produkteve “ushqime, pije dhe duhan”, ku eksportet shqiptare drejtohen kryesisht në Austri, Bosnie Hercegovinë, Belgjikë, Bullgari, Zvicër, Ceki, Qipro, Gjermani, Danimarkë, Spanjë, Francë, Britani e Madhe, Greqi, Kroaci, Hungari, Itali, Letoni, Mali i Zi, Maqedoni, Hollandë, Poloni, Rumani, Rusi, Sloveni, Slovaki, Turqi, Kosovë dhe Serbi.

Prodhimet e tjera shqiptare që eksportohen janë minerale, lëndë djegëse, energji elektrike, produkte kimike, plastike, lëkurë dhe artikuj të saj, prodhime druri, letre, tekstile, këpucë, materiale ndërtimi, metale, makineri, pajisje dhe pjesë këmbimi.

Në 3 vitet e fundit vëren studimi i “Open Data Albania”, janë rritur eksportet shqiptare të materialeve të ndërtimit dhe metaleve në Hungari dhe Armeni, ndërsa makineritë, pajisjet e ndërtimit dhe pjesë të këmbimit në Norvegji dhe Portugali, si dy tregje krejt të reja.

Afrika zë vendin e dytë për eksportet shqiptare pas Europës, ku rezulton se në vitet 1993-2012 nga “zero” lekë, arritën vjet në 1,7 miliardë lekë. Rritja shënohet nga eksportet e materialeve të ndërtimit dhe metaleve në Egjypt dhe eksporteve të makinerive, pajisjeve dhe pjesëve të këmbimit në Afrikën e Jugut.

Amerika paraqitet me ulje - ngritjet në eksportet shqiptare. Ndërsa në vitin 1993 vlera e tyre kapi shumën 522 milionë lekë, për t’u rritur në 1, 5 miliardë lekë në vitin 1994, në periudhën 1994-2008 eksportet shqiptare ruajtën thuajse të njëjtën situatë në vlerën 451 milionë lekë. Ndryshimi në këtë raport nisi më pas dhe në 2010 ato kapën vlerën 2,8 miliardë lekë.

Në këtë rritje ndikoi direkt rritja e eksporteve të materialeve të ndërtimit dhe metaleve me Agjentinën, si dhe me Kanadanë, ku Shqipëria në 20 vjet ka rritur sasitë e eksporteve të ushqimeve, pijeve, duhanit, minerale, lëndë djegëse, tekstile dhe këpucë.

Por Shqipëria shënon rritje të këmbimeve tregtare edhe me Azinë, ku vlera e mallrave të eksportuar në tregjet e saj shënoi vlerën më të lartë me 10,5 miliardë lekë në vitin 2010. Vitet e fundit u rritën eksportet e materialeve të ndërtimit dhe metaleve me Japoninë, Jordaninë, Indinë, Izraelin, Indonezinë, Emiratet e Bashkuara Arabe.

Në vitin 1996 eksportet shqiptare shënuan pik-un e vet edhe me kontinentin e largët të Australi – Oqeanisë me vlerën 36 milionë lekë. Në vitin 2012 grupet e mallrave që u eksportuan më shumë drejt kontinentit të largët ishin materiale ndërtimi dhe metale, makineri, pajisje dhe pjesë këmbimi, si dhe ushqime, pije dhe duhan më shumë në vitet 2007-2009 si dhe tekstile dhe këpucë në vlera më të vogla.

HermesNews - ©2013

Dërgo me email | Stampo artikullin