27/04/2013 12:10:54

Manifestime në Mejë

Shumica e trupave të viktimave të masakrës në Mejë, ishin zhvarrosur nga një varrezë masive në Batajnicë afër Beogradit, në Serbi, ku ishin dërguar nga forcat serbe në përpjekje për të fshehur gjurmët e mizorive në Kosovë

PRISHTINË - Dita e të Zhdukurve të Kosovës, 27 Prilli, u organizua sot nën kujdesin e Qeverisë së Kosovës, me nje manifestim në Mejë, pranë Lëndinës së Pikëllimit, rrethina e Gjakovës. Sot në Kosovë, 14 vjet pas luftës së përfunduar në qershorin e vitit 1999, ende nuk janë gjetur më shumë se 1750 të zhdukur.

Në 27 prill 1999, në Mejë, forcat serbe rrembyen nga kolonat e refugjatëve dhe masakruar e zhdukur 377 shqiptarë. Asnjëri nga të ndaluarit në rrethimin e hekurt nuk kishte arritur të dilte i gjallë. Ajo ishte një nga kolonat e shumta të spastrimit etnik, të rreth 1 milion shqiptarëve të dëbuar nga Kosova, shumica e tyre drejt Shqipërisë.

Shumica e trupave të viktimave të masakrës në Mejë, ishin zhvarrosur nga një varrezë masive në Batajnicë afër Beogradit, në Serbi, ku ishin dërguar nga forcat serbe në përpjekje për të fshehur gjurmët e mizorive në Kosovë.

Në prag të Ditës së të Pagjeturve është bërë e ditur se, prokurorët e EULEX-it nga Prokuroria Speciale e Kosovës zyrtarisht kanë iniciuar hetimet për Krime të Luftës të kryera në komunën e Gjakovës, më 27 dhe 28 prill 1999, duke i përfshirë fshatrat Mejë, Orizë dhe fshatrat tjera të Luginës së Rekës së Keqe, dhe deri tani prokurorët kanë identifikuar përafërsisht 20 të pandehur. Në njoftimin e EULEX theksohej se, masakra e Mejës dhe e rrethinës pretendohet të jetë vrasja më e madhe masive që ndodhi gjatë konfliktit të vitit 1999 në Kosovë.

Mbrëmë, në një nga sheshet në qendër të Prishtinë, u ndezën 1750 qirinj, të mbuluar me nga një pikëpyetje. Kështu, Nisma e të Rinjve për të Drejtat e Njeriut shënoi Ditën e të Zhdukurve të Kosovës. Nga Prishtina zyrtare është kërkuar që çështja e të zhdukurve, zbardhja e fatit të tyre, të jetë pjesë e bisedimeve mes Kosovës dhe Serbisë.

HermesNews - ©2013

Dërgo me email | Stampo artikullin