26/04/2013 11:44:32

Tiranë, librat që gjeni online mbi artin

Dixhitalizimi i Universitetit të Arteve i jep mundësi studentëve të navigojnë në materialet e ndryshme dhe të gjejnë elementet e duhur për punimet që u nevojiten

TIRANË - Biblioteka e Universitetit të Arteve tashmë do të mund të shfrytëzohet online nga studentët, artistë e gjithë të interesuarit.Dixhitalizimi i fondit të bibliotekës së Universitetit të Arteve, ku përfshihet arkiva e muzikës, fondet speciale të dorëshkrimeve të kompozitorëve shqiptarë, dramave të vjetra etj, tashmë mund të aksesohet shumë lehtë.

Sipas rektorit të UA-së, Petrit Malaj, ky dixhitalizim i jep mundësi studentëve të navigojnë në materialet e ndryshme dhe të gjejnë elementet e duhur për punimet që u nevojiten.

Biblioteka e Universitetit të Arteve është biblioteka më e madhe dhe më e vjetra e artit në Shqipëri. Ajo është një bibliotekë Universitare, unike, dhe ndihmon në mënyrë të drejtpërdrejtë në formimin e artistëve të rinj. Ajo është krijuar në vitin 1966, vit në të cilin u krijua Instituti i Larte i Arteve, sot Universiteti i Arteve.

Fondi fillestar i saj ishte ai i Bibliotekës së Konservatorit Shtetëror të Tiranës, Shkollës së Arteve të Bukura, dhe Shkollës së Lartë të Aktorëve "Aleksandër Moisiu" si dhe me donacione nga shoqata dhe dashamirës të artit.

Në fondet e saj disponon materiale të shumëllojshme si libra, parte, dorëshkrime, dizertacione, diploma, periodike, referenca, materiale audiovizuale, literature elektronike, etj. Fondi i Bibliotekës së Universitetit te Arteve përmban rreth 35,000 vëllime. Pjesa më e madhe e fondit është unikale.

Dixhitalizimi i bibliotekës është mundësuar falë një projekt të financuar nga Banka Botërore. Biblioteka është e aksesueshme në faqen online të UA-së.

HermesNews - ©2013

Dërgo me email | Stampo artikullin