23/04/2013 18:31:52

Shqiperia feston Diten e Librit

Ka vite që çdo 23 prill, në pesë kontinentet, festohet Dita Botërore e Librit dhe e të Drejtës së Autorit

TIRANË - Shkrimtarë, botues, pedagogë e studentë u mblodhën paraditen e sotme në ambientet e Fakultetit të Historisë dhe Filologjisë për të marrë pjesë në aktivitetet e zhvilluara në kuadër të Ditës Botërore të Librit dhe të Drejtës së Autorit, për të diskutuar mbi librin dhe letërsinë shqipe.

Për të gjashtin vit radhazi ky fakultet zhvilloi një sërë veprimtarish promovuese për libra të rinj si dhe një panair, në të cilin morën pjesë disa shtëpi botuese, të cilat prezantuan botime të fushave të ndryshme

Aktivitetet u çelën rreth orës 9:30, paraditen e sotme dhe vazhdun gjatë në disa sallë të Fakultetit të Historisë dhe Filologjisë, ku specialistë të ndryshëm, shkrimtarë, studiues apo botues diskutuan problemet e librit në vend.

Në keto aktivitete u theksua se gjatë vitit 2012 në Shqipëri është botuar më shumë letërsi vendase se sa e huaj dhe kryesisht poezi se sa një vit më parë. Studiues e shkrimtare theksuan edhe një herë mungesën e kritikeve, te cilët do te selektonin këtë prodhimtari letrare.

Bibliteka Kombëtare ka kremtuar Ditën e Librit dhe te Drejtës se Autorit, duke ekspozuar për herë të parë botime të rralla të diplomatëve, udhëtareve apo aventuriereve, të gjitha mbi Ali Pashe Tepelenën si dhe ka promovuar librin e akademikut grek Spiro Mela mbi figurën kontroverse te Pashait te Janines.

Ka vite që çdo 23 prill, në pesë kontinentet, festohet Dita Botërore e Librit dhe e të Drejtës së Autorit. Prej vitit 2001 edhe Shqipëria, i është bashkëngjitur vendeve të botës për festimin e kësaj dite të shënuar të dijes, nën moton që e karakterizon tradicionalisht “një libër, një lule”.

HermesNews - ©2013

Dërgo me email | Stampo artikullin