19/04/2013 20:00:34

Kosova dhe Serbia firmosin marëveshjen historike

Catherine Ashton përshëndeti marrëveshjen e arritur mes dy vendeve

(20:11) Presidenti i Komisionit Europian, Jose Manuel Barroso deklaroi sot se ''marrëveshja e arritur sot mes Serbisë dhe Kosovës ishte një hap historik dhe se duhej aktualizuar menjëherë në terren''. ''Përshëndes zhvillimin më të fundit mbi marrëveshjen mes Serbisë dhe Kosovës, kjo ishte një marrëveshje historike që duhet të vihet në zbatim në terren shumë shpejt'', deklaroi presidenti i KE-së, Jose Manuel Barroso. ''Kam besim se marrëveshja e arritur mes dy palëve do të përgatisë rrugën për Këshillin e BE-së lidhur me vendimet e ardhshme për sa u takon hapave drejt itinerarit evropian të Serbisë dhe Kosovës, thelbësor për stabilitetin dhe prosperitetin e mbarë rajonit Evropian'', përfundoi kreu i ekzekutivit të BE-së.


(20:10) Kryeministri serb, Ivica Daçiç në një koment mbi marrëveshjen e arritur sot me Kosovën, në Bruksel u shpreh ''se ishte një vendim i vështirë që do influenconte mbi të ardhmen e vendit''. ''Ishte një vendim tepër i vështirë, por që do të ndikojë dukshëm në të ardhmen e vendit'', u shpreh kreu i qeverisë serbe. ''Të gjitha kërkesat e Serbisë u pranuan, për sa i takon policisë, drejtësisë, shëndetësisë, arsimit dhe u hoq pjesa që kishte lidhje me sansksionimin e anëtarësimit të Kosovës në organizmat ndërkombëtare'', theksoi Daçiç.


(20:08) Beogradi do të japë të hënën një përgjigje përfundimtare mbi pranimin ose jo të marrëveshjes me Prishtinën, të nënshkruar sot në Bruksel, që do të jetë adresuar drejtpërdrejt tek baronesha Catherine Ashton, deklaroi kryeministri serb, Ivica Daçiç, gjatë një konference për shtyp menjëherë pas përfundimit pozitiv të raundit të dhjetë të negociatave Serbi-Kosovë.

Daçiç theksoi se ''sot nuk e kishte nënshkruar tekstin e marrëveshjes, por se kishte rënë dakord në pranimin e saj''. Në fundjavë në Beograd do të ketë konsultime me presidentin dhe të gjitha forcat politike dhe mëngjesin e së hënës, përmes një mesazhi të shkruar, Ashton do të informohet mbi pranimin përfundimtar ose jo të marrëveshjes.

Të hënën Ashton ka në program një fjalim në Këshillin e Ministrave të Jashtëm të BE-së në Luksemburg, për informimin e tyre mbi progresin në dialogun mes Beogradit dhe Prishtinës. Ndërkohë që Daçiç u tregoi gazetarëve gjatë konferencës për shtyp një kopje të tekstit të marrëveshjes së pranuar prej tij dhe drejtuesve të Prishtinës dhe po ashtu nga Ashton.


(20:07) Kryeministri Sali Berisha përshëndeti marrëveshjen e arritur në Bruksel, midis Kosovës dhe Serbisë. ”Sot, në Bruksel, pas negociatash serioze u arrit marrëveshja midis Kosovës dhe Serbisë, me ndërmjetësimin e Baroneshës Ashton dhe mbështetjen direkte të Shteteve të Bashkuara të Amerikës për procesin”, deklaron Berisha.

Ai thekson se kjo marrëveshje historike përbën një arritje madhore, tejet të rëndësishme për Kosovën dhe Serbinë, normalizimin e marrëdhënieve midis tyre. “Marrëveshja e Brukselit ka një rëndësi të madhe për të gjithë rajonin tonë, për paqen, bashkëpunimin dhe integrimin rajonal dhe europian.Marrëveshja e sotme hap një kapitull të ri në marrëdhëniet midis shqiptarëve dhe serbëve në rajonin tonë, në përpjekjet e tyre për një të ardhme të përbashkët europiane”, thekson më tej kreu i ekzekutivit.

Berisha shton se “me këtë rast, në emër të qeverisë shqiptare përshëndes vendosmërinë, kurajën, vizionin e të dyja palëve, të dy kryeministrave Thaçi dhe Dacic, për arritjen e saj. Përshëndes Baroneshën Ashton për ndërmjetësimin e aftë, të durueshëm dhe të suksesshëm, si dhe mbështetjen e mikut tonë të madh, Shteteve të Bashkuara të Amerikës, që bënë të mundur këtë arritje historike për Kosovën, Serbinë dhe rajonin tone”.


(20:05) Kryeministri kosovar, Hashim Thaçi u shpreh sot në Bruksel pas arritjes së marrëveshjes Serbi-Kosovë se ''ky hap përbënte fillimin e një epoke të re pajtimi dhe bashkëpunimi''. ''Kjo marrëveshje përfaqëson fillimin e një epoke të re pajtimi dhe bashkëpunimi mes shteteve'', deklaroi kreu i qeverisë kosovare, Hashim Thaçi, në përfundim të raundit të 10 të negociatave mes Kosovës dhe Serbisë, në Bruksel, të kryesuara dhe ndërmjetësuara nga kryediplomatja evropiane, baronesha Catherine Ashton.


(20:01) Për kryeministrin kosovar, Hashim Thaçi, ''marrëveshja që u nënshkrua pak më parë mes Prishtinës dhe Beogradit përfaqëson 'de jure' njohjen e Kosovës nga ana e Serbisë''. Gjatë një konference për shtyp në Bruksel, pas përfundimit me një hap pozitiv të raundit të 10 të bisedimeve, Thaçi, i cili po ashtu citohej nga media serbe, shtoi se ''marrëveshja me Beogradin garanton sovranitetin dhe integritetin territorial të Kosovës''. Kryeministri kosovar deklaroi se ''priste që vendet që nuk e kishin njohur ende pavarësinë e Kosovës ta bënin këtë sa më shpejt, ku shtoi se shpresonte që shumë shpejt Kosova të bëhej anëtare e Kombeve të Bashkuara.


(20:00) Shefja e Diplomacisë së Bashkimit Evropian, baronesha Catherine Ashton ''përgëzoi pak më parë Kosovën dhe Serbinë për marrëveshjen e arritur lidhur me përmirësimin e marrëdhënieve mes dy vendeve'', pas 9 raunde bisedimesh të ndërmjetësuara nga BE-ja. ''Dua të përgëzoj të dyja palët për vendosmërinë e treguar prej tyre gjatë këtyre muajve të fundit dhe qasjen tepër kurajoze që kanë shfaqur liderët e Kosovës dhe Serbisë'', deklaroi Ashton menjëherë pas përfundimit të takimit trepalësh. Ajo po ashtu theksoi se ''ajo që po shikonte e gjithë Bota në këto momente ishte një hap që i largonte vendet nga e kaluara dhe i afronte ato më tepër drejt të ardhmes së tyre në Evropë''.


BRUKSEL - Përfaqësuesja e Lartë e BE-së për Politikën e Jashtme dhe Sigurinë, Catherine Ashton konfirmoi pak minuta më parë se negociatat mes Kosovës dhe Serbisë u përfunduan ''me një marrëveshje''. ''Negociatat kanë përfunduar, teksti i marrëveshjes u nënshkrua nga të dyja palët'', u shpreh Ashton pas daljes nga selia 'Eeas', ku u zhvilluan negociatat, para se të nisej drejt zyrave të NATO-s së bashku me delegacionet kosovare dhe serbe. Catherine Ashton përshëndeti marrëveshjen e arritur mes dy vendeve. "Kjo marrëveshje hap rrugën drejt normalizimit të marrëdhënieve mes dy vendeve", deklaroi gjatë një konference shtypi Hashim Thaçi.

HermesNews - ©2013

Dërgo me email | Stampo artikullin