19/04/2013 13:06:00

Artizanët kërkojnë mjediset e kalasë për veprimtarinë prodhuese

Tregtarët kërkesë bashkisë për zhvendosjen e veprimtarisë prodhuese

GJIROKASTËR - Artizanët gjirokastritë, që ushtrojnë veprimtarinë e tyre prodhuese dhe tregtuese në dyqanet e Qafës së Pazarit, kanë kërkuar nga bashkia dhe drejtoria e monumenteve, zhvendosjen e kësaj veprimtarie në mjediset e kalasë shekullore të qytetit.

Ushtrimi i veprimtarisë së tyre në mjediset e kalasë do të rijetëzojë edhe më shumë këtë objekt madhështor, por më kryesorja do të mundësojë një shitje më të madhe të prodhimeve, pasi kalaja është edhe objekti më i vizituar nga turistët e huaj dhe vendas.

"Ka ardhur momenti që të gjithë artizanët të grupohen në mjediset e kështjellës së qytetit", tha Muhedin Makri, mjeshtër i gdhendjes së gurit, pasi një grupim i tillë do të shërbejë edhe për artizanët, edhe për një zhvillim më të madh të turizmit në qytet.

Makri shtoi "se në dyqanet e pazarit turistët bëjnë një kalim të shpejtë, ndërsa ndalen gjatë në kala, e cila është edhe simbol i qytetit tonë. Nëse në pazar turistët bëjnë një kalim prej 10 -15 minuta, në kala. për vetë vlerat e saj, pozicionin gjeografik dhe sheshpamjen mbi qytet etj, ata qëndrojnë pjesën më të madhe të kohës".

Në kala në çdo orë të ditës ka dyndje vizitorësh, ekzistojnë mundësitë dhe kushtet që të bëhet një ekspozim më i mirë i prodhimeve artizane, ekspozim që nuk mund të bëhet në dyqanet aktuale për shkak të sipërfaqeve të kufizuara të tyre dhe kufizimit me rrugën, mungesa e parkimeve, etj.

Prodhimet artizane të qytetit siç janë ato në gur, dru, hekur, apo me gjilpërë, janë nga më të preferuarat prej turistëve të huaj. Në çdo sezon turstik turistët e huaj janë blerësit kryesorë të këtyre prodhimeve.

HermesNews - ©2013

Dërgo me email | Stampo artikullin