16/04/2013 12:18:59

Claudia Cardinale 'feston' në Durrës

Artistja feston këto ditë 75 vjetorin e lindjes

DURRES - Aktorja e njohur italiane, Claudia Cardinale, e cila feston këto ditë 75-vjetorin e lindjes, ka një vend të veçantë në qytetin e Durrësit. Në gusht të vitit 2011 ajo ishte mysafire e qytetit bregdetar, në kuadër të edicionit të 4-t të Festivalit ndërkmbëtar veror të filmit.

Aktorja ikonë e kinematografisë botërore ka zënë vend në minibulevardin e artistëve, pranë teatrit "Aleksandër Moisiu" ku janë projektuar një pjesë e filmave të Festivalit. Cardinale tregoi me atë rast se Shqipërinë e njeh si gjithë italianët e tjerë.

"Unë sigurisht që dija disa gjëra, pasi mjaft shqiptarë jetojnë në Itali dhe këtë informacion si çdo italian e kam dhe unë. Është hera e parë që vij dhe jam e mrekulluar nga pritja që më bëtë. Do t'i shijoj të gjitha ditët që do jem këtu", tha aktorja në Durrës.

Claudia Cardinale, që njihet si një nga aktoret që frymëzoi regjisorë të mëdhenj si, Federico Fellini apo Sergio Leone, qëndroi disa ditë në Durrës, ndërsa në ekrane shfaqej filmi i fundit i saj "Të jesh italian me zonjën Enrika", punuar nga regjisori i ri turk Ali Ilhan.

Gjatë ditëve të Festivalit të filmit, Cardinale nënshkroi edhe pllakën qeramike kushtuar asaj, e cila u vendos pranë teatrit përkrah artistëve të mëdhenj të kinemasë që kanë vizituar Durrësin si, Francis Ford Coppola, Fanny Ardant, Lech Majewski, Rade Serbedzija, Ian Harlan, Marco Bellocchio, etj, por edhe të artistëve shqiptarë të gjallë e jo të gjallë si, Sandër Prosi, Dhimitër Anagnosti, Nikolin Xhoja, Xhanfize Keko, Agim Qirjaqi, etj.

HermesNews - ©2013

Dërgo me email | Stampo artikullin