05/04/2013 10:14:02

Mitrovice, digjen dy automjete

Policia në Mitrovicë nuk është prononcuar deri tani për këto ngjarje

(18:54) Situata e sigurisë në veri të Mitrovicës është e qetë, por jo e qëndrueshme, vlerësuan të premten zyrtarët komunalë dhe përfaqësuesit e strukturave të sigurisë, të cilët morën pjesën në takimin e Komitetit të Sigurisë që mbahet në kuadër të Drejtorisë për Mbrojtje dhe Shpëtim të Komunës.

Drejtori i kësaj drejtorie, Behxhet Bala, tha se në përgjithësi gjatë javës së fundit situata ka qenë e qetë, por ajo vazhdon të jetë e paqëndrueshme.

“Incidentet e shpeshta në veri dhe provokimet e strukturave ilegale serbe janë duke e mbajtur situatën të tensionuar”, tha ai. Në anën tjetër, komandanti i stacionit jugor të policisë, Avni Zabeli, tha se java e kaluar ka qenë e tensionuar për shkak të bisedimeve që janë zhvilluar në Bruksel. “Duke pasur parasysh rrethanat në veri, Policia e Kosovës ka shtuar masat e sigurisë në zonat me popullatë të përzier”. Ai gjithashtu bëri të ditur se kanë vazhduar patrullimet e përbashkëta me EULEX-in.


MITROVICE - Dy automjete u dogjën mbrëmjen e djeshme në pjesën veriore. Një nga automjetet e djegura ishin në pronësi të prodekanit të një fakulteti të Universitetit të Prishtinës në Mitrovicë, siç quhet ndryshe, Universiteti me mësim në gjuhën serbe në këtë qytet, kurse automjeti tjetër ishte një kamion, pronë e Trepçës. Të dy këto djegie kanë ndodhur pas mesnate. Ndërsa automjet i prodekanit është djegur në oborrin e Spitalit në pjesën veriore të Mitrovicës, kamioni është djegur në garazhin e Kompanisë Trepça, në Zveçan.

HermesNews - ©2013

Dërgo me email | Stampo artikullin