03/04/2013 19:03:07

12 sportistet shqiptare ne Europian

Shqiperia, pretendentja kryesore per medalje

TIRANE- Do të jenë 12 sportistët që do të përfaqësojnë Shqipërinë në Kampionatin Evropian të Peshëngritjes për Të Rritur, që do të mbahet në kryeqytetin e vendit tonë, në Tiranë, nga data 5, deri më 15 prill 2013. Një gjë e tillë është konfirmuar nga Federata Shqiptare e Peshëngritjes, e cila i ka dhënë kështu një faze përgatitore afro 3-mujore, ku u përfshinë afro 50 sportistët më të mirë të vendit.

Dhe, pas zhvillimit në fillim të marsit të Kampionatit Kombëtar të Peshëngritjes për Të Rritur, organizmi që qeveris shtangën shqiptare, ka bërë edhe testimet dhe provat e fundit, duke çuar në këtë përzgjedhje përfundimtare, duke e reduktuar me afro 75 % grupin e sportistëve që do të përfaqësojnë vendin tonë në këtë veprimtari kontinentale që mbahet për herë të parë në vendin tonë. Siç shihet, lista përfundimtare do të përbëhet nga shtangiste femra dhe 10 meshkuj.

Për femra, flamurin kuqezi do ta mbajë nënkampionia e kontinentit, Romela Begaj, si dhe e rikthyera Fetije Kasaj. 26-vjeçarja Begaj vjen në këtë veprimtari duke synuar të bëjë më në fund të vetën kurorën kontinentale, duke përfituar edhe nga fakti që do të konkurrojë në Tiranë, përballë publikut vendas, që sipas gjasave do të jetë një shtysë më tepër për të kapur majën e podiumit. Por edhe 27-vjeçarja Kasaj ka treguar se, me një garim të përmbajtur, por rikthehet gradualisht në nivele të larta edhe në nivele ndërkombëtare.

Ndërkaq, për meshkuj, në mungesë të Erkand Qerimajt dhe Hysen Pulakut të pezulluar për shkak të dopingut, barra kryesore për medalje do të bjerë në supet e Daniel Godellit, i cili ka shërbyer edhe si simbol i imazhit të Kampionatit Evropian të Tiranës, dhe të rivalit të tij, Briken Calja. 21-vjeçari Godelli, një kampion bote për të rinj dhe medalist në kampionatet evropiane të të rinjve, por edhe të të rriturve, do të synojë ashtu si dhe Begaj, të përfitojë nga fakti “fushë”, pra, garimi në shtëpi kundrejt rivalëve.

Ndërkaq, me një garim të kujdesshëm, 23-vjeçari Calja ishte peshëngritësi më i suksesshëm shqiptar në Olimpiadën e vitit të shkuar në Londër dhe konkurrenca e tij me Godellin mbetet mjaft interesante dhe shpresohet të prodhojë medalje për Shqipërinë në Evropianin e këtij muaji. Përsa u përket të tjerëve, duke lënë mënjanë 29-vjeçarin Isa Bala, 27-vjeçarin Endri Haxhihyseni dhe 24 vjeçarin Ervis Tabaku, të tjerët janë të rinj dhe ky Evropian do të jetë një përvojë e mirë për ta.

Kështu, 16-vjeçari Arbër Çerçizi, 17-vjeçari Anxhelo Shabani, 19-vjeçari Romario Avdiraj, 20-vjeçari Xhulio Prroni dhe 21-vjeçari Krenar Shoraj, do të kenë shansin e madh të masin forcat me më të mirët e kontinentit dhe të botës, në këtë Kampionat Evropian. Nuk dihet ende nëse ata do të konkurrojnë në bateritë A, në bateritë B apo C
të kësaj veprimtarie, pasi gjithçka do të varet nga deklarimi i peshës paraprake në dyjarësh, që do të përcaktojë edhe nivelin e konkurrimit.

Ja përbërja e ekipit kombëtar që do të përfaqësojë Shqipërinë
në Kampionatin Evropian të Peshëngritjes për Të Rritur:

Sportistët:
Femra:
1. Romela BEGAJ 02/11/1986 58 kg 220 kg
2. Fetije KASAJ 28/10/1985 58 kg 190 kg

Meshkuj:
1. Anxhelo SHABANI 17/01/1996 56 kg 220 kg
2. Arbër ÇERÇIZI 28/04/1997 56 kg 230 kg
3. Romario AVDIRAJ 03/02/1994 62 kg 255 kg
4. Briken CALJA 18/02/1990 69 kg 145-170 kg
5. Daniel GODELLI 10/01/1992 69 kg 150-180 kg
6. Krenar SHORAJ 15/01/1992 77 kg 150-190 kg
7. Xhulio PRRONI 07/05/1993 85 kg 340 kg
8. Endri HAXHIHYSENI 27/08/1986 85 kg 115-140 kg
9. Ervis TABAKU 29/09/1989 94 kg 360 kg
10. Isa BALA 11.08.1984 +105 kg 167-205 kg

Trajnerët
1. Kastriot RUKAJ (Vlorë)
2. Ilir ÇELA (Elbasani)
3- Sokol BISHANAKU (Tirana)
4- Zef KOVAÇI (Shkodër)
5- Leonard TOSKA (Shtërmen)

HermesNews-©2013

Dërgo me email | Stampo artikullin