28/03/2013 10:11:32

Çmime për Ditën Botërore të Teatrit

Teatri Kombëtar i Kosovës, për herë të parë si institucion i shtetit të Kosovës, u anëtarësua me të drejta të plota në Konventën Europiane të Teatrove, një institucion jashtëzakonisht i rëndësishëm për teatrin në mbarë Europën

PRISHTINË - Në Ditën Botërore të Teatrit, në një ceremoni të organizuar në Teatrin Kombëtar të Kosovës, Ministria e Kulturës, Rinisë dhe Sportit nderoi sot me Çmimin Kombëtar për Vepër Jetësore në fushën e teatrit (pas vdekjes), aktorin Istref Begolli, i cili iu dorëzua vajzës së aktorit, nga ministri kosovar i Kulturës, Memli Krasniqi. “Çmimet për teatër janë një vlerësim institucional për artistët”, tha në fjalën e tij Krasniqi, ndërsa vlerësoi veprimtarinë e aktorit Begolli, i cili, siç tha ai, ka lënë gjurmë të pashlyeshme në jetën teatrore në Kosovë". Çmimi vjetor për shfaqjen më të mirë për vitin 2012 iu dha shfaqjes "Nata e dymbëdhjetë" e Shekspirit, me regji të Ilir Bokshit dhe produksion të Teatrit Kombëtar, ndërkohë që çmimi vjetor për regjinë më të mirë për vitin 2012 iu dha Fadil Hysajt, për regjinë e shfaqjes "Shtëpia në ankand". Çmimin për aktorin më të mirë për vitin 2012 e mori aktori Ismet Azemi, për rolin në shfaqjen "Vrasja e Mushkonjës", ndërsa çmimi vjetor për prezantim të suksesshëm ndërkombëtar për vitin 2012 , iu dha Shtëpisë teatrore “AKT” .

HermesNews - ©2013

Dërgo me email | Stampo artikullin