12/03/2013 12:09:25

Durrës, një muze për të kujtuar mospërdorimin e armëve

Ndal dhunës !

DURRES - Qyteti i Durrësit do të ketë së shpejti një muze me makete armësh, të cilat kanë shkaktuar dëmtime të rënda apo kanë marrë jetë njerëzish të moshave të ndryshme. Kryetari i Komitetit të Miqve Anti-minë, Besnik Alibali, tha se projekti i muzeut do të realizohet në një nga bunkerët që ndodhen në bregdet, në lagjen e Currilave.

"Në një sipërfaqe prej 45 metra katrore ne synojmë të vendosim makete të minave dhe bombave, me qëllim njohjen veçanërisht nga të rinjtë të rreziqeve që shkaktojnë armët për jetët njerëzore", tha Alibali. Sipas nismëtarit të këtij muzeu, bunkeri që aktualisht është i mbyllur ndodhet në krye të rrugës "Andi dhe Rudini", dy fëmijë të cilët kanë humbur aksidentalisht jetën nga shpërthimi i një bombe të vjetër shumë pranë bregut të detit.

"Ngjarja e rëndë ka ndodhur në fundin e viteve 1980, por mina të luftës së dytë botërore janë gjetur shpesh herë gjatë punimeve për hapjen e themeleve edhe gjatë 20 vjetëve të fundit", shtoi Alibali, i cili ka punar për shumë vite si oficer xhenjer. Realizimi i këtij muzeu do të ketë mbështetjen e organizmave të huaja simotra të luftës kundër minave dhe eksplozivëve, tha ai, duke vleresuar se muzeu do të ketë edhe vlera historike. Në përfundim të luftës së dytë botërore forcat naziste e minuan plotësisht bregdetin dhe portin e qytetit të Durrësit.

HermesNews - ©2013

Dërgo me email | Stampo artikullin