11/03/2013 17:36:19

Durrës, femrat gjyqtare në futboll

Gjykimet e vajzave kanë qenë mjaft efektive dhe vendimet e tyre janë zbatuar nga futbollistët e rinj në fushë

DURRES - Vajzat dhe gratë që drejtojnë ndeshjet e futbollit do të jenë gjithnjë e më të pranishme në veprimtatitë rajonale dhe kombëtare. Drejtori i Zyrës rajonale të FSHF-së në Durrës, Dritan Babamusta, tha për ATSH-në se të paktën 10 vajza dhe gra të moshave të ndryshme përgatiten që prej tre vjetësh për të qenë gjyqatare në takime të rëndësishme futbolli. Ai thotë se gjyqtaret e ardhshme kanë moshë 17-25 vjeç dhe gjatë muajve të fundit kanë drejtuar veprimtari të ndryshme rajonale të ekipeve të të rinjve.

Adifete Tola, një nga gjyqtaret e kolegjit të futbollit në Durrës, tha se bashkë me kolegen Mane Hajdari dhe dy gjyqtarë të tjerë kanë drejtuar të gjitha ndeshjet e kampionatit të dytë të kalçetos mes shkollave të mesme. Ne jemi të kënaqura me punën e përbashkët në fushë si dhe me reagimet pozitive të spektatorëve dhe të lojtarëve, tha më tej Tola.

Sipas drejtorit Babamusta, gjykimet e vajzave kanë qenë mjaft efektive dhe vendimet e tyre janë zbatuar nga futbollistët e rinj në fushë. Tashmë vajzat dhe gratë gjyqtare po përgatiten të drejtojnë ndeshje të kampionatit të futbollit në shkallë vendi.

HermesNews - ©2013

Dërgo me email | Stampo artikullin