05/03/2013 17:40:11

Vlorë, festime për 7 Marsin

Protagonistët e këtij spektakli ishin vetë nxënësit, të cilët, përmes këngëve dhe valleve të bukura, uronin mësuesit e tyre për këtë ditë

VLORË - Sot në mjediset e Pallatit të Kulturës "Labëria" në Vlorë, Qendra Kulturore e Fëmijëve "B.Tushi" organizoi me rastin e 7 Marsit, ditës së mësuesit, montazhin muziko-letrar "Mirënjohje". Protagonistët e këtij spektakli ishin vetë nxënësit, të cilët, përmes këngëve dhe valleve të bukura, uronin mësuesit e tyre për këtë ditë. Përveç numrave që ishin përfshirë në programin e këtij spektakli, protagonistë u bënë edhe mësuesit, të cilët me një kolazh këngësh të bukura përshëndetën të pranishmit që kishin mbushur sallën e shfaqjeve të Pallatit të Kulturës "Labëria". Në këtë aktivitet u nderuan me mirënjohje edhe mësues të ndryshëm që kanë dhënë një kontribut të shquar për punën e bërë me fëmijët, me krijimtarine e tyre. Kështu u nderuan me mirënjohje të Qendrës Kulturore të Fëmijëve, koreografi veteran Jani Gjergji, regjisori, i cili nuk jeton më, Vasil Beqari, këngëtarja e mirënjohur Veneranda Billa si dhe kompozitori Vahit Kuçaj. Nëpërmjet videos u shfaqën figura të shquara të arsimit shqiptar, që nga çelja e shkollës së parë shqipe, duke vazhduar me mësuesit vlonjatë, të cilët kanë dhënë një kontribut të shquar, jo vetëm për arsimin në Vlorë, por edhe për atë kombëtar.

HermesNews - ©2013

Dërgo me email | Stampo artikullin