04/03/2013 15:48:14

Edipi Mbret, premierë në Tiranë gjatë fundjavës

Shfaqja vjen si ngacmim artistik dhe perceptim i asaj që ndodh sot, pra përrallës së Sofokliut në zbërthimin e situatave dhe karaktereve

TIRANË - Tragjedia e Sofokliut "Edipi Mbret" me regji të Ilir Bokshit është premiera e parë e Teatrit Kombëtar, që do të ngjitet në skenë këtë fundjavë.
Nje sfond muzikor me elementë shqiptarë çel shfaqjen, ndërkohë që elementë të tjerë të tillë do të jenë të pranishëm gjatë shfaqjes.

Regjisori dhe aktorët janë në ditët e fundit të provave për të sjellë mbrëmjen e datës 9 Mars shfaqjen me një skenografi të pastër, ku element kryesor është dielli, daullet si objekt që përdoren nga vetë aktorët nëpërmjet ritmeve dhe këngëve si zbërthime emocionale dhe artistike.

Daullet zbresin nga lart si një lidhje midis qiellit dhe tokës, perëndisë dhe njeriut të kësaj marrëdhënie sa mitologjike dhe verbërisë kolektive si element përcjellës i njerëzimit në çdo kohe.

Kjo shfaqje vjen si ngacmim artistik si dhe perceptim i asaj që ndodh sot, pra përrallës së Sofokliut në zbërthimin e situatave dhe karaktereve. Për regjisorin, të sjellë antikitetin në skenë është sfidë, ndaj ai planifikon të sjellë për publikun një shfaqje spektakolare, me shumë ritëm dhe muzikalitet. Vepra do të sillet në kohën e sotme dhe do të gërshetohet me antikitetin, por asgjë nuk ndryshon prej përrallës së Sofokliut.

Edipi, ky mbret, i cili që kur është lindur është i destinuar të vrasë babanë dhe të martohet me të ëmën duke lindur fëmijë nga nëna që është lindur vetë ai. Jokastra duke dashur ta ndalojë këtë ngjarje makabre, ia jep foshnjën Edip një bariu për ta vrarë.

Helidon Fino është protagonisti i shfaqjes, nën interpretimin e Edipit. Jokastra do të vijë nga Yllka Mujo, Korifeu nga Ema Andrea, Kreoni nga Neritan Liçaj, etj.

Shfaqja është një produksion i Teatrit Kombëtar në bashkëpunim me Teatrin Kombëtar të Kosovës. Nga Teatri i Prishtinës pjesë e produksionit është jo vetëm regjisori Ilir Bokshi, por edhe kompozitori, Trimor Dhomi, skenografi Petrit Bakalli dhe kostumografja Vesa Kraja.

HermesNews - ©2013

Dërgo me email | Stampo artikullin