26/02/2013 17:06:42

Gjirokastër, shiu dëmton Kalanë

Megjithë ndërhyrjet e pjesshme restauruese në kalanë e Gjirokastrës nga Drejtoria e Monumenteve në këtë qytet, sërish ka nevojë për vlera financiare restauruese për të ruajtur parametrat kryesorë dhe për të qenë në shërbim të zhvillimit të turizmit

GJIROKASTËR - Ndonëse dy vite më parë në kështjellën e Gjirokastrës u investuan rreth 150 mijë euro për hidroizolimin e taracës dhe evitimin e lagështirës në mjediset e brendshme të saj, sërish këto probleme janë prezente gjatë të gjithë periudhës së dimrit.

Gjatë ditëve me reshje të rrëmbyeshme shiu, në kala konstatohet lagështira si pasojë e ujrave që depërtojnë në brendësi. Kjo reflekton më tej një imazh negativ tek turistët vendas apo të huaj, që vizitojnë këtë monumet tepër të rrallë në gjithë Ballkanin.

Sipas Besnik Shehut, punonjës në muzeun e armëve dhe njëherësh Kryetar i Këshillit Bashkiak të qytetit, lagështira në mjediset e brendshme të kalasë po dëmton të gjitha trofetë e ekspozuara për vizitorët dhe krijon një mjedis mbytës dhe të ftohtë, i cili largon turistët.

“Hidroizolimi i taracës së kalasë në të gjithë sipërfaqen e saj është e vetmja zgjidhje për të shpëtuar objektet, dokumentet dhe materialet historike", tha Shehu.

Megjithë ndërhyrjet e pjesshme restauruese në kalanë e Gjirokastrës nga Drejtoria e Monumenteve në këtë qytet, sërish ka nevojë për vlera financiare restauruese për të ruajtur parametrat kryesorë dhe për të qenë në shërbim të zhvillimit të turizmit.

Administrimi i një pjese të kalasë nga Bashkia dhe një pjese tjetër nga Drejtoria e Monumenteve e vështirëson edhe më shumë problemin e investimeve në të, problem i cili nga viti në vit bëhet më shqetësues.

HermesNews - ©2013

Dërgo me email | Stampo artikullin