24/02/2013 14:22:41

Bust për Sabri Godon dhe Jeronim de Radën

Busti i Jeronim De Radës, vepër e realizuar nga Odise Paskali, do të vendoset po në lulishten përpara Parlamentit, përballë rrugës Jeronim De Rada, ndërsa busti i Sabri Godos do të vendoset në lulishten përpara Parlamentit

TIRANË - Bashkia e Tiranës vendosi shtimin e dy busteve në kryeqytet. Do të jetë ai i politikanit, shkrimtarit dhe skenaristit, Sabri Godo si dhe ai i poetit dhe luftëtarit të çështjes kombëtare shqiptare, Jeronim De Rada.

Busti i Sabri Godos do të vendoset në lulishten përpara Parlamentit, ngjitur me shëtitoren Murat Toptani, nga Akademia e Shkencave, sipas planvendosjes bashkëlidhur këtij vendimi.

Ndërsa busti i Jeronim De Radës, vepër e realizuar nga Odise Paskali, do të vendoset po në lulishten përpara Parlamentit, përballë rrugës Jeronim De Rada.

Godo njihet si një penë e rrallë, në romanet me karakter historik, ku më të bujshmet e më të diskutuarat janë “Skënderbeu”dhe “Ali Pashë Tepelena”. Mbi këto figura që i kalonin përmasat e kombit, ai nuk reshti së kërkuari. Këto romane janë ripunuar e ribotuar disa herë, janë përkthyer në disa gjuhë dhe vlerësuar lart nga kritika.

Si një njohës i thellë i karakterit njerëzor, shkroi po me aq mjeshtëri romanet e novelat mbi luftën, për të cilat u akuzua nga censura e regjimit si shkrimtar i deheroizimit dhe vuajti pasojat. Në vitin 1974 u përjashtua nga Lidhja e Shkrimtarëve për “devijim nga realizmi socialist” dhe u dërgua për “riedukim” për 11 vjet (1974-1985).

De Rada luajti një rol të madh në historinë e letërsisë shqiptare. Ai është i pari që shkroi vepra me frymë kombëtare. Figura e tij ngrihet si figura më e kulluar dhe më e fuqishme e letërsisë dhe e botës arbëreshe.

Ndikimi i tij mbi shkrimtarët arbëreshë bashkëkohës ishte i madh; tradita poetike shkruar prej tij vijon të jetojë e përtërirë edhe në letërsinë e sotme arbëreshe. Pas Çlirimit në Shqipëri janë botuar të adoptuara veprat e tij kryesore. Mban titullin "Mësues i Popullit".

Busti i Jeronim De Radës mban vlerën e dyfishtë pasi është një nga punimet më të arrira të artistit Odise Paskali Skulptor i Popullit.

HermesNews - ©2013

Dërgo me email | Stampo artikullin