22/02/2013 09:38:21

Diskriminimi social-ekonomik i policisë së burgjeve

nga Valentin Macaj

TIRANE - Kur lejohet me vite diskriminimin social-ekonomik në një shërbim policor të rëndësisë jetike, do te thotë se ai miraton gjithçka ndodh në zyrat e DPBurgjeve.

Eshtë për të ardhur keq !

Shkelja ligjore në lidhje me trajtimin ushqimor, kujtojmë VKM nr.231 dt.19/4/2006, policët e burgjeve nuk marrin çdo muaj 6600 lekë të rinj (sipas normës ushqimore të vitit 1975), deri më sot asnjë përgjigje dhe asnjë ndëshkim të përgjegjësve para ketij fakti.

Borxhi i shtetit ndaj policit të burgjeve, vetëm për trajtimin ushqimor, arrin në dy paga mujore në vit.

Mungesa e transportit për punonjësit e burgjeve ka sjellë pasojë në
mbarëvajtjen e punës në institucione dhe në disa raste policët kanë humbur jetën në rrugët e kryqëzimet e Shqipërisë, (raste që i kemi denoncuar në media).

Por çfarë përfitojnë fëmijët e policëve të aksidentuar ?! Thjesht pension familjar. Askush nuk pyet për policin e burgjeve nëse vdes rrugëve nga mungesa e transportit.

Rasti me flagrant, ai i familjes së policit të ndjerë Trota në Kukës, ku fëmijët e tij përfitojnë pension jetimi dhe jo si fëmijë të një polici të aksidentuar për shkak të detyrës.

Cdo ditë shohim dhjetëra policë me stema të burgjeve, të cilët bëjnë autostop për t'u kthyer në familje apo për të shkuar në vëndshërbim. Dy-tre burgje që kishin mjete transporti për punonjësit, ka kohë që i kanë mbyllur në parking për shkak të mungesës së logjistikës, por dhe kur kanë funksionuar, policët kanë paguar biletën, karburantin ose shërbimin që i bëhet mjetit.

Sindikata ka kërkuar qysh prej 5 vitesh pagesën e bonusit të transportit sipas tarifës lek/km, ndërsa drejtuesit e burgjeve thjesht kanë arkivuar kërkesat tona.

Trumbetimi me të madhe i “rritjeve” periodike të pagave për policinë e burgjeve, ka rezultuar si regres për xhepat e tyre, pasi ka patur ulje të saj si page reale.

Vendimi i Qeverisë nr.1061 i Korrikut 2010 hoqi pagesën e vjetërsisë së punës dhe me sistemin e gradave cungoi pagën mujore e rriti detyrimin e
taksës mbi pagë për çdo punonjës policie.

Heqja e vjetërsisë së punës do të thotë 10-15% më pak në pagën mujore.
Paga e 13-të për policinë e burgjeve është një ëndërr në sirtar, pasi mungon kontrata kolektive.

Sindikata protestoi për ndryshimin e këtij vendimi duke paraqitur argumenta bindës, por edhe kësaj radhë qeveria e kaloi në indiferencë ankesën ligjore.

Dështimi 5 vjeçar në paisjen me uniforma verore e dimërore, detyron policët e burgjeve të zbarkojnë në tregjet e “gabit” ku blejnë këmisha, xhaketa, këpucë, ndërsa gradat i blejnë në një dyqan tjetër.

Deri më tani shteti nuk ka ndëshkuar përgjegjesin e dështimeve të njëpasnjëshme të tenderave për uniforma e paisje në policinë e burgjeve.

I vetmi ndëshkim ka ndodhur me largimin nga detyra të një specialisti të policisë burgjeve, i cili nuk pranoi të jetë pjesë e korrupsionit në pranim materialesh jashtë standarti.

Qeveria ndërhyri për rikthimin në punë të këtij oficeri, e ndërsa drejtuesi i burgjeve bën bllokadën “kundër” saj.

Kushtet e punës në regjimet e jashtme dhe sektorët e brëndshëm janë diskriminuese për punonjësin e policisë sv burgjeve. Mungesa e fondeve ka detyruar vetë policët që të blejnë mjete ngrohëse si mënyrë mbijetese në temperaturat e dimrit .

Paradoksi në këtë rast ndodh kur të dënuarit ngrohen me sisteme kaldajash, ndërsa punonjësit e shtetit kërcasin dhëmbët në vendroje prej të ftohtit.

Kushtet higjeno-sanitare në godinat e policisë lënë shumë për të dëshiruar, mungojnë garderobat, dushet, kutitë e ndihmës së shpejtë deri dhe sapunë për të larë duart. Asnjë punonjësi të transferuar, apo që banon larg vendit të punës, nuk i sigurohen kushtet hoteliere dhe ushqimi në institucion.

Kontrollet mjekësore periodike për policinë e burgjeve, të parashikuara në ligjin “Për sigurinë dhe shëndetin në pune”, nuk aplikohen edhe pse në çdo burg ka një sektor shëndetësor që ofron shërbim për të burgosur e paraburgosur. Nga verifikimet e sindikatës, rezulton që një pjesë e konsiderueshme e policëve vuan nga sëmundje turbekulare, respiratore dhe neurologjike.

Marredhëniet e punës në Policinë e Burgjeve janë një histori dështimi për shkak të paaftësisë dhe keqdashjes në zbatimin e ligjit të saj nr.10032, Kodit të Punës në RSH si dhe gjithe akteve ligjore e nenligjore në zbatim.

Kontratat e punës bazohen pjesërisht në ligj dhe nuk përmbushin kushtet e punës së punonjësve si në vend shërbim, ashtu dhe në regjimet e brendëshme.

Ato thjesht janë një shkresë zyrtare që kanë kushte detyruese për punonjësin, pa asnjë detyrim të përcaktuar për punëdhënësin.

Ndërkohë që sindikata kërkon nënshkrimin e kontratës kolektive të punës me Policinë e Burgjeve, parashikuar kjo në ligjin e saj dhe urdhërin e Ministrit të drejtesise nr.3125 dt.4/9/2009,neni 20, drejtuesi i burgjeve e bllokon këtë proçes në mënyrë të paligjshme duke krijuar një precedent në rajon e më gjerë.

Mungesa e kontraktimit kolektiv ka sjellë t’kurrjen e të drejtave sociale në këtë shërbim policor, si rrjedhojë rekrutimi, motivimi në gradë e funksion, shpërblimet, ditët e gadishmerisë, trajtimi ushqimor e transporti, veshmbathja, kushtet e punës, transferimet, largimet nga puna për motive partiake janë aktualitet i dhimbshëm në Policinë e Burgjeve.

Shembuj të shumtë tregojnë largimin e ekspertëve të policisë së burgjeve dhe zevëndësimin e tyre me analfabetë, agronomë, gjeologë e mesues që nuk kanë asnjë lidhje me shërbimin policor.

Policë politik pa asnjë eksperiencë pune, tani drejtojnë disa sektorë sigurie nëpër burgje dhe janë shndërruar në trafikantë vendesh pune në grupe shoqërimi, grupe sigurie dhe lëvizin policët e ndershëm për t’i hapur rrugën korrupsionit e futjes së sendeve të ndaluara në burg.

Rastet e kapjes së celularëve, lëndëve narkotike, armëve të ftohta, pijeve alkolike, sendeve të tjera të ndaluara, do të thotë se ky shërbim policor po lëngon nën menaxhimin e të paaftëve dhe korrupsionit politik qe ka sunduar tashmë te gjithe sektorin ne fjale.

Aktualisht drejtuesi i burgjeve po përndjek sindikatën, duke tentuar minatorizimin e këtij shërbimi policor me qëllim diskriminimin total të policisë së burgjeve.

Institucionet shtetërore e ato të BE kanë insistuar dhe insistojnë që situata e dialogut social të përmiresohet në Policinë e Burgjeve, por ky zyrtar me tipare moniste, duke patur suport politik, e ka ndarë mendjen që Karta Sociale Europiane dhe Konventat e ILO-s të mos gjejnë terren në këtë shërbim.

Sindikatës i lind e drejta që me çdo mënyrë të ligjshme të protesojë e denoncojë situatën dhe t’i kërkojë qeverisë zbatimin e ligjit dhe detyrimeve që rrjedhin nga standartet e kushteve të antarësimit në BE.

Bunkerizimi i burgjeve dhe politizimi i të drejtave sociale në policinë e burgjeve do të thotë vazhdim të diskriminimit në pagë, shpërblim, uniforma, trajtim ushqimor e transport dhe mungesë të kontratës kolektive të punës.

Qeveria po hesht tani e 5 vite me radhë, ndaj duhet ngritur zëri nga Sindikata jonë në sajë të medias së lirë. Kjo nuk do mungojë !!!


* Autori është Kryetar i Sindikatës së Shërbimeve Policore të Shqipërisë

HermesNews - ©2013

Dërgo me email | Stampo artikullin