21/02/2013 19:07:20

Zyra e BE-së jep grantet e reja për shoqërinë civile

Christof Stock, shef i operacioneve në Zyrën e BE-së/PSBE tha se 'BE-ja mbetet e zotuar për të vazhduar mbështetjen e përpjekjeve të OJQ-ve kosovare për promovimin e demokracisë, të të drejtave të njeriut, përfshirjes sociale dhe sundimit të ligjit'

PRISHTINË - Zyra e Bashkimit Europian në Kosovë/Përfaqësuesi Special i BE-së ka shpallur sot pesë grantet e reja për shoqërinë civile, të cilat financohen nga programi për përkrahjen e shoqërisë civile.

Këto projekte do të mbështesin përpjekjet e shoqërisë civile në krijimin e kushteve të nevojshme për një dialog konstruktiv, sistematik dhe efikas, dhe një partneritet në mes të shoqërisë civile dhe institucioneve qeveritare në të gjitha nivelet e qeverisjes, si dhe përpjekjet në fuqizimin e ndikimit të të rinjve në politikbërje dhe vendimmarrje që ndërlidhen me zhvillimin socio-ekonomik dhe përfshirjen e tyre në procesin e integrimit në BE.

Këto pesë projekte kanë filluar në dhjetor 2012 dhe implementohen nga Qendra Evropiane për Çështje Minoritare, Iniciativa për Zhvillim të Bujqësisë në Kosovë, Fondacioni Kosovar për Shoqëri Civile, Saferworld dhe World Vision.

Programi për përkrahjen e shoqërisë civile është një program i Komisionit Evropian, i cili mbështet zhvillimin e shoqërisë civile për të qenë pjesë aktive në debate publike për demokraci, të drejta të njeriut, përfshirje sociale dhe sundim të ligjit, dhe ndërton kapacitetin e tyre për të ndikuar në proceset politikbërëse dhe vendimmarrëse.

Skema e re për grante e këtij programi për Kosovë pritet të lansohet në javët në vijim, përmes një thirrjeje të re për propozime.

HermesNews - ©2013

Dërgo me email | Stampo artikullin