19/02/2013 14:00:28

Opera 'Toska' sot dhe nesër në TKOB

Toska interpretohet nga Eva Golemi dhe Marjana Leka, ndërsa në role të tjera janë, Leonardo Gramegna në rolin e Mario Cavaradossi, Ylber Gjini (baroni Scarpia), Ogert Islami (Cesare Angelotti ), Sidrit Bejleri (Il Sagrestano ), Gilmond Myftari, Erlind Zeraliu (Spoletta)

TIRANË - Opera Toska, një ndërthurje e dramës, trillerit dhe dashurisë rikthehet sot në mbrëmje në Teatrin Kombëtar të Operas dhe Baletit. Pas premierës së saj, tre ditë më parë, shfaqja me regji të Nikolin Gurakuqit vjen e bazuar në simbolikë dhe krahas zërit e muzikës, vepra është bazuar ndjeshëm edhe tek aktrimi. Në këtë rivënie pas gjashtë vjetësh, për sa i përket konceptit regjisorial, janë hequr elementët realistë të cilët kanë qenë pjesë në skenografinë e mëparshme. Opera me tre akte e Puçinit ka një ritëm shumë të lartë. Është një opera triller, një dramë dashurie që është vendosur në një sfond historik në Europën e Revolucionit Francez. Vepra mbyllet në mënyrë tragjike pasi Scarpia vritet në zyrën e tij, Toska hidhet nga kështjella dhe Avradosi pushkatohet. Opera “Toska” është premiera e parë e këtij sezoni artistik për Teatrin Kombëtar të Operas dhe Baletit, i cili këtë vit kremton edhe 60-vjetorin e themelimit të tij. Në këtë premierë interpretojnë solistët, kori dhe Orkestra Simfonike e TKOB-së, si dhe kori i liceut “Jordan Misja”.

HermesNews - ©2013

Dërgo me email | Stampo artikullin