19/02/2013 13:46:50

Barroso, mesazh nga Brukseli për takimin Kosove - Serbi

Presidenti Barroso tha se, 'kjo javë është e rëndësishme pasi po presim rezultatet e dialogut mes kryeministrit Thaçi dhe Kryeministrit të Serbisë, Daçiç, dhe shpresojmë që ky takim të vazhdojë në frymë konstruktive, pasi rezultatet janë shumë të rëndësishme për marrëdhëniet mes Kosovës dhe Serbisë'

TIRANË - "Komisioni Europian mbështet zhvillimin e dialogut mes Kosovës dhe Serbisë për përmirësimin e marrëdhënieve mes tyre, si dhe do të vazhdojë të angazhohet për perspektivën europiane të Kosovës", deklaroi sot Presidenti i KE-së, Hose Manuel Barroso, gjatë një konference të përbashkët për shtyp, në Bruksel, me Kryeministrin e Kosovës, Hashim Thaçi.

"Gjatë takimit me kryeministrin Thaçi diskutuam mbi progresin e bërë përsa i përket marrëveshjes së procesit të asocim-stabilizimit për në Bashkimin Europian. Kjo marrëveshje do të bëhet nëse Kosova përmbush misionet apo prioritetet e kërkuara", tha Barroso.

Kryeministri i Kosovës, Hashim Thaçi, duke falënderuar Presidentin e KE-së, Barroso tha se, "Kosova në këto 5 vite shtet ka shënuar progres të gjithanshëm në ndërtimin e institucioneve dhe infrastrukturës ligjore dhe fuqizimin e subjektivitetit ndërkombëtar dhe në rritjen e saj ekonomike, por në veçanti në rrugën e saj europiane".

Ne, tha Thaçi, jemi të vetëdijshëm se duhet të bëjmë më shumë për rritjen e besimit të qytetarëve në institucione. Ne do të vazhdojmë bashkarisht bashkëpunimin me institucionet europiane që janë prezente në Kosovë, në veçanti me EULEX në mëyrë që të zbatojmë në veçanti kriterin e sundimit të ligjit dhe vazhdimin e betejës kundër fenomeneve negative siç janë lufta kundër korrupsionit, krimit të organizuar dhe fenomeneve të tjera negative".

"Si lidership jam i vetëdijshëm se kemi përgjegjësi për brezat që do të vijnë edhe për normalizimin e marrëdhënieve me Serbinë, si dy shtete të pavarura dhe sovrane. Ne sot do takohemi si dy kryeministrat e dy vendeve tona për të diskutuar për hapat tanë të mëtejshëm me shpresë dhe optimizëm për arritjet e marrëveshjeve të reja për të normalizuar në tërësi raportet Kosovë-Serbi ,që do të kuptonte përfundimisht edhe europianizimin e të gjithë rajonit tonë", theksoi Thaçi.

Kryeministri Thaçi tha se, "e sigurova zotin Barroso që Kosova është e gatshme të punojë në mënyrë të përgjegjshme dhe kreative në këtë proces".

HermesNews - ©2013

Dërgo me email | Stampo artikullin