15/02/2013 13:30:51

Policia publikon oraret e reja të trafikut

Njësia rajonale e trafikut Prishtinë ka ndërmarrë të gjitha masat e nevojshme për të përcaktuar lirimet, kufizimet, bllokimet e plota apo të pjesshme të segmenteve të caktuara rrugore në kryeqendër me qëllim të rregullimit të qarkullimit rrugorë dhe drejtimit të trafikut

PRISHTINE - Ju njoftojmë se me rastin e 5 vjetorit te pavarësisë së Republikës së Kosovës, Policia e Kosovës ka bërë të gjitha përgatitjet lidhur me kremtimin e ditës së shpalljes së Pavarësisë. Meqenëse kryeqyteti rëndohet nga një numër i madh automjetesh dhe qytetarësh dhe duke vlerësuar se bllokimi i segmenteve të caktuar rrugore paraqet vështirësi në rrjedhën normale të trafikut Policia e Kosovës do të ndërmarrë këto masa:

- Ofrimi i kushteve për qarkullimin normal për të gjithë shfrytëzuesit të komunikacionit rrugor.
- Udhëzimet e duhura për parking të transportit komercial, autobuzët dhe veturat e udhëtarëve.
- Krijimin e një mjedisi të qetë dhe të sigurt në tërë territorin e Republikës së Kosovës.

Në këtë kontest njësiti regjional i trafikut do të veproj në të gjitha rrugët magjistrale të regjionit të Prishtinës dhe në qytete duke formuar pikat e kontrollit me qëllim të udhëzimit të automjeteve dhe vendosjen në parkingjet e planifikuara.

Me këtë rast në të gjitha udhëkryqet që lidhin magjistralet me kryeqendrën do të ketë patrulla policie të cilat do t’i udhëzojnë drejtuesit e automjeteve për parkimin e automjeteve të tyre në pjesët e caktuara për parkimin brenda qytetit dhe jashtë tij.

Prandaj për të përballuar sa më lehtë rrethanat që do të paraqiten me këtë rast në qarkullimin rrugor, kërkojmë ndihmën, besimin dhe mirëkuptimin e gjithë qytetarëve dhe veçanërisht lusim qytetarët e kryeqytetit që të shmangin lëvizjet e tyre me vetura.

Komunikate per Shtyp

Dërgo me email | Stampo artikullin